Sa araw ng Martes ay magpupulong ang mga mahistrado ng Korte Suprema para talakayin ang dekada ng haba na kaso ng Vizconde Massacre.

Ayon kay Justice Midas Marquez, spokesman ng Supreme Court, sa loob ng taong ito ay magbaba na sila ng desisyon kung mananatili sa pagkakakulong ang grupo ng pangunahing akusado na si Hubert Webb o tuluyan na silang makakalaya.

Anuman ang magiging desisyon ng Supreme Court, tatanggapin itong maluwat ng naulilang si Lauro Vizconde.

“Naniniwala ako na sobra na silang (Hubert et al) nagdusa at sana ay matapos na nga itong kaso nang pare-pareho na tayong makapamuhay ng normal,” ayon kay Mang Lauro nang makausap ko sa Tonight with Arnold Clavio sa Q Channel 11.

May tampo pala si Mang Lauro kay dating Sen. Freddie Webb nang minsan sa isang forum ay ‘di nito inabot ang kanyang pakikipagkamay.

Inamin din ni Mang Lauro na minsan siyang umibig muli pero ‘di rin naging matagumpay sa huli.

“Ang pinakamahirap na bahagi ng buhay ko ay ang tanggapin na wala na ang aking mag-iina. At nawala sila sa oras na malayo ako sa kanila at sa paraang karumal-dumal,” ayon kay Mang Lauro, “pero ngayon tanggap ko na mas maluwag na ang loob ko.”

Para kay Mang Lauro, walang kaduda-duda sa kanyang isip na sina Hubert ang gumawa ng kawalanghiyaan sa kanyang mag-iina.

Ikinuwento ni Mang Lauro na isang linggo bago naganap ang massacre ay nagsumbong sa kanya si Carmela tungkol sa “isang anak ng pulitiko” na binigo niya sa pag-ibig.

“Walang ibang may motibo kundi siya (Hubert),” dugtong pa ni Mang Lauro.

Umaasa naman ang kampo nina Webb na susuriing maigi ng mga mahistrado ang mga impormasyon na magpapatunay na nasa Estados Unidos si Hubert nang maganap ang massacre.

Malaking pabor sa kanila ang pagkawala ng “semen sample” ng Parañaque RTC para mapawalang sala si Hubert.

Lord, Kayo na po ang bahala.