Kasama ng pito pang public servants, ako po ay sumumpa bilang bagong miyembro ng Liberal Party noong nakaraang Huwebes, Nobyembre 12. Ito ay naganap sa national headquarters ng LP sa Cubao, Quezon City.

Ang komento po ng mga iilan, “Akala ko ba’y bagong pulitika ang isinusulong ni Among Ed? Bakit siya sumapi sa isang matandang partido na ang kanyang magiging kasama ay trapo?” At sabi pa ng iba, “Wala, talagang trapo na rin iyang si Gov. Panlilio. Bumagsak na rin sa kumunoy ng transactional politics!”

Matagal-tagal ko na ring nakasama sina Gov. Ted Baguilat ng Ifugao, Gov. Grace Padaca ng Isabela, Mayor Jesse Robredo ng Naga City at Councilor Bolet Banal ng Quezon City. Lahat po sila ay kasapi sa LP. Sila ang nakapag-kumbinse sa akin na mabuting samahan ang LP sapagkat napakabuti po ng mga public servants na ito. Ito ay maliwanag kong kaalaman sapagkat kami ay magkakasama sa Kaya Natin na nabuo sa tulong at pangunguna ni Prof. Harvey Keh ng Ateneo de Manila University. Nitong mga nakaraang buwan ay sumama na rin sa amin sina Congressmen Neric Acosta at TG Guingona ng Bukidnon.

Ang Kaya Natin ay binubuo ng mga nanunungkulan sa ating bansa na nagpapamalas ng isang de prinsipyong pamamahala na ginagamit ang pamantayan ng transpa­rent, accountable, people participated and principled politics.

Kaya nga hindi rin naging mahirap ang pagpapasya nina Mayors Lorenzo ng San Isidro, Nueva Ecija, Jun Verzosa ng Taguidin, Ilocos Sur at Tante Gerdan ng Sta. Fe, Nueva Vizcaya.

Inuulit ko po kapag mabubuti ang mga kasapi, tiyak na mabuti rin ang kasapian.

At isasama pa po natin dito ang pamunuan ng LP na sina Senators Noynoy Aquino at Mar Roxas na nagpakita ng pagiging simple, kababaan ng loob, kabaitan at pag-aalay ng sarili. Hindi po perpekto ang LP at hindi lahat ng mga kasapi rito ay masasabi nating tunay na leader. Ngunit, sa tulong ng mga tunay na nagmamalasakit na Pinoy na kahit hindi kasapi ng LP ay naniniwala na sa LP maaaring panggalingan ng matagal na nating minimithing pag-asa ng ating Inang Bayan.

Ang pangalawa pong dahilan ng aking pagsapi sa LP ay ang konkretong kalagayan sa amin sa Pampanga na kamukha ng maraming probinsiya sa buong bansa. Malakas po ang ruling party sa amin. At napalakas ng impluensya ng traditional, patronage, jueteng at money politics halos sa lahat ng bayan. Ngunit sa bawat bayan din ay makikita natin ang mga mamamayan at leaders na gusto nang baguhin ang politika ngunit walang iisang makinarya ang nag-uugnay sa kanila upang sila ay sama-samang magsulong ng panibagong pulitika.

Sa tulong ng panibagong pag-asa, isang sariwang hangin na ating nalalanghap sa buong bansa bunga ng pagpapasyang paghabol ng magkatambal na Noynoy at Mar, tanging ang LP lang ang maaaring magbunsod sa mga ito. Nararamdaman ko at naniniwala akong pwede itong bigyang daan ang pag-iral ng good governance, ethical leadership at responsible citizenship sa Pampanga. At parang nakikita ko na ang ganitong daloy ay ating masasaksihan sa buong bansa.

Isa pang dahilan kung bakit maipagmamalaki ko na ang LP ay isang marangal na Lapian ay dahil mismo sa yumao kong ama. Ang aking Tatang Basio ay naging konsehal at Vice Mayor sa aming bayan, ang Minalin, noong 50s at 60s. Siya po ay nanilbihan ng malinis at mahusay.

Hulahan po ninyo ang kanyang sinamahang partido-Liberal Party.

Para sa inyong mga komento, magpadala lamang ng text sa 0919-9575444.

Para sa inyong mga komento, pwede kayong magpadala ng email sa kayanatin@yahoo.com.