NETS HUMIRIT SA CAVALIERS

San Antonio angat sa Phoenix

Kumana ng one-hand drive si Phoenix Suns’ Leandro Barbosa ng Brazil sa harap ng depensa ni San Antonio Spurs’ Fabricio Oberto ng Argentina sa first quarter ng Game 5 ng NBA Western Conference semifinal round playoffs. (AP Photo)

CLEVELAND (AP) --- Nakaiwas sa maagang summer vacation ang New Jersey Nets sa pamamagitan ng hindi impresibong panalo sa Cleveland, 83-72, at mahila sa 3-2 ang NBA playoff series.

Sa pangunguna ni Jason Kidd na kumamada ng 20 points, nagawang magpundar ng Nets ng 22-point lead sa third quarter subalit nagkumahog sa huling bahagi bagama’t nagawang kumapit sa tagumpay at naipuwersa ang Game 6 ng Eastern Conference semifinals sa Biyernes sa kanilang sariling balwarte.

Nagtala lang ang New Jersey ng isang field goal at umiskor ng six points sa fourth quarter sa 1-of-15 shooting from the field. Ang Nets ay 4-of-10 din lang sa free throw line sa huling 12 minutes.

Ang Cavaliers na nabigong isara ang serye sa kanilang sariling teritoryo ay may 3-of-17 shooting sa fourth quarter.

Hindi na naglaro sa Cleveland sa huling 56 segundo si LeBron James, na nagka-injury nang makipag-agawan sa loose ball kay Kidd.

Kumana ng 20 points si James para pamunuan ang Cavs habang si Zydrunas Ilgauskas ay may 16.

PHOENIX (AP) --- Pumukol si Bruce Bowen ng 3-pointer may 36 segundo sa laro, at tinalo ng San Antonio Spurs ang kapos sa taong Phoenix Suns, 88-85, para umangat sa 3-2 sa Western Conference semifinals.

Maaaring tapusin ng Spurs ang series sa Game 6 sa Biyernes sa San Antonio.

Ang Suns, na naglaro nang wala si all-NBA center Amare Stoudemire at ang kanyang pamalit na si Boris Diaw, ay gumamit lang ng six-man rotation.

Lumamang sila ng 16 sa second quarter at angat 79-71 may 5:18 ang nalalabing oras sa laro.

Masama ang simula ni Manu Ginobili, pero bumawi sa final quarter nang umiskor ng 15 ng kanyang 26 points para mag-rally ang Spurs at lumamang 86-83, 10.5 seconds pa.

Nagmintis si Steve Nash sa isang 3-pointer sa harap ng depensa ni Tim Duncan, saka naipasok ni Michael Finley ang dalawang free throws 5.5 seconds ang nalalabi para iselyo ang tagumpay.

Sina Stoudemire at Diaw ay nasuspendi ng isang laro sanhi ng paglusob sa court matapos ang flagrant foul ni Robert Horry kay Nash, 18 seconds pa sa nakaraang Game 4.

Si Horry ay napatawa ng two-game suspension.

<BACK