ADS 

LUIS, DOBLE INGAT

Dondon Sermino

INAMIN ni Luis Manzano na maraming security o guwardiado (mula sa PNP, dahil wala naman daw silang private army) sa ngayon ang mommy niyang si Vilma Santos. Lalo na ngayong mainit pa rin ang bilangan sa laban sa gobernador sa Batangas, na kung saan ay nangunguna nga si Vilma.

"Nakakatakot naman talaga ang politics, in general. Hindi lang sa Batangas. Ang mommy ko naman, she’s not stupid or ignorant sa mga ganyang bagay.

"Alam niya na kailangan niyang mag-ingat. And there’s Tito Ralph (Recto) naman na nagbabantay sa kanya," sabi ni Luis.

At hindi rin itinanggi ni Luis na pati siya ay doble-doble ang pag-iingat na ginagawa, na tipong hindi siya lumalabas masyado, o nagpupunta sa mga lugar na alam niyang delikado.

Sa ngayon, hindi pa raw masyadong naglilibot sa Batangas ang mommy niya, at mas madalas na nasa bahay lang ito.

"Hindi siya mayor ngayon. She wants to be there for us, for the whole family," say ni Luis.

"But of course, she’s very happy. Kumbaga, naghihintay na lang siya ng formality," dugtong pa ni Luis.

Kung medyo kabado raw sila ngayon, `yun ay dahil sa puwedeng kalabasan sa bilangan ng mga senador. Medyo delikado kasi ang tayo ng Sen. Recto sa bilangan.

Anyway, masaya si Luis ngayon dahil nadagdagan na naman ang inendorso niyang produkto. Nandiyan nga ang Kremil-S na unang inendorso ng tatay niyang si Edu Manzano.

Malaking tulong daw kay Luis ang Kremil-S, dahil sa sobrang busy raw niya sa trabaho, hindi na niya namamalayan ang pagod at paglipas ng gutom.

Eh, malakas din daw siyang uminom ng kape, at kung minsan, sobra-sobra naman daw ang pagkain na nilalantakan niya.

Sabi nga ni Luis, hindi niya mamamalayan na may hyperacidity siya, kung hindi niya inendorso ang gamot na ito.

<BACK