|
May apat na
katanungan si Jack, isa sa mga sumusubaybay sa column na ito.
Sasagutin natin ngayon ang unang dalawang tanong:
1.
"Ang Espiritu Santo ba ang manganganak sa atin sa bawtismo?"
Malaki
ang papel na ginagampanan ng Espiritu Santo sa bagong kapanganakan
ng isang tao. Sa sandaling magsisi sa kasalanan ang taong iyon,
tanggapin si Cristo Jesus at manampalataya sa Kanya, limang
mahahalagang bagay ang ginagawa ng Espiritu Santo sa bagong
mananampalatayang iyon:
Una:
Ang makasalanang tao na tumalikod sa kasalanan at tumanggap kay
Cristo ay ginagawang isang "bagong nilalang" ng Espiritu
Santo. Ito ang ibig sabihin ng "ipinanganak ng Espiritu"
(Tito 3:5; Juan 3:3-7; 1 Pedro 1:23; Santiago 1:18).
Ikalawa:
Binabawtismuhan ng Espiritu Santo ang taong dating makasalanan
ngunit sumampalataya na kay Cristo (Roma 6:3-4; 1 Corinto 12:13;
Galatia 3:27; Efeso 4:4,5; Colosas 2:12).
Ikatlo:
Ang Espiritu Santo ay nananahan sa mananampalataya ( Juan14:20; 1
Corinto 2:12; 1 Corinto3:16; Juan 14:16; Juan 7:37-39; Roma 8:9; 1
Juan 3:24; 2 Corinto 5:17; Galatia 5:16-18; Efeso 3:16).
Ikaapat:
Sineselyuhan o "tinatatakan" ng Espiritu Santo ang
mananampalataya, upang bigyang kasiguraduhan ang mananampalataya
tungkol sa kanyang kaligtasan (2 Corinto 1:22; Efeso 1:13-14; Efeso
4:30; 2 Corinto 5:5).
Ikalima: Pinupuspos
ng Espiritu Santo ang mananampalataya kay Cristo at binibigyan Niya
ito ng kapangyarihang mamuhay nang banal at nagsisilbi sa Diyos (Mga
Gawa 2:4; Mga Gawa 4:8; Mga Gawa 13:52).
2.
Anak ba ng Diyos ang Espiritu Santo?
Ang
Anak ng Diyos (o Diyos Anak) ay si Cristo Jesus, hindi ang Espiritu
Santo. Ang iisang Diyos ay may tatlong Persona: Diyos Ama,
Diyos Anak, at Diyos Espiritu Santo. Ang misteryong ito’y
kinukumpirma ng isa sa mga pangalan ng Diyos sa wikang Hebreo: ang
"Elohim". Ang salitang "Elohim" ay isang plural
noun o pangngalang maramihan. Subalit sinasabi rin ng
Deuteronomio 6:4 na "ang Panginoon nating Diyos ay iisang
Panginoon". Ang misteryong ito ay pagpapatunay na ang tunay na
Diyos ay hindi tulad ng karaniwang tao dahil hindi kayang malirip ng
ordinaryong pag-iisip ang lahat ng katotohanan tungkol sa Kanya.
"Inilagay [ng Diyos] ang walang hanggan sa isipan ng tao,
gayunma’y hindi niya malalaman ang ginawa ng Diyos mula sa
pasimula hanggang sa wakas" (Ecclesiastes 3:11).
Sa
aklat na "The Great Doctrines of the Bible" ng Bible
scholar na si William Evans ay makikita ang magandang paliwanag
tungkol kay Elohim : "Ang Ama ay ang kabuuan ng Diyos na
di-nakikita (Juan 1:18); ang Anak ay ang kabuuan ng Diyos na
nagpakita (Juan 1:14-18); ang Espiritu ay ang kabuuan ng Diyos na
agarang kumikilos sa kalagitnaan ng Kanyang mga nilalang (1 Corinto
2:9, 10).
Salamat
sa sulat, Jack. May utang pa akong dalawang sagot. Itutuloy.
[NABIIM,
P.O. Box 468 Araneta Center, Cubao, Quezon City 1135
Philippines. Email: nabiim2006@yahoo.com] |