Malalim ang sugat na nilikha ng ‘Hello Garci’ scandal. Pero kung merong grabeng napuruhan ito, walang iba kundi ang Commission on Elections (Comelec).

Hanggang ngayon ay malaki ang pagdududa ng taumbayan sa kredibilidad ng komisyon. Una, hindi magbabantay ng ganito ang taumbayan kung lubos ang kanilang tiwala sa Comelec.

At ang mensaheng ito ang nabasa ng media sa ginagawang pagtutok sa lahat ng uri ng bilangan. Kahit ‘unofficial’, kita ang pagtitiwala ng tao. Kahit paano kasi ay nagkaroon ng alternatibong napagkukunan ng impormasyon ang taumbayan hinggil sa estado ng bilangan.

Kahit dalawang araw lang, malaking bagay ang nagawa ng ‘unofficial, partial tally’ ng AMA at STI na isinahimpapawid ng dalawang higanteng television networks (GMA 7 at ABS-CBN 2).

Bagama’t inaasahan na natin ang pagpalag ng mga kampo at partidong hindi napapaboran ng resulta, hindi naman yata tama na papanaigin ang kanilang angal dahil interes ng taumbayan ang higit na dapat pangibabawin.

Nakakagulat lang ang mabilis na aksyon ng Comelec sa reklamo ng Team Unity (TU) at sa hirit nito na ipatigil ang media count. Unang-una, mismong ang Comelec ang nagbigay ng awtorisasyon sa AMA at STI para magsagawa ng independenteng ‘quick count’. Ngayon ay sinasabi ni Comelec Chairman Benjamin Abalos na ang counting lang ang awtorisado at hindi ang pagsasapubliko nito. Hindi raw dapat naki-tie up sa mga media networks ang dalawang leading computer schools.

Tanong: para saan ang quick count ng AMA at STI kung hindi ito isasapubliko? Pangalawa, bakit gayon kabilis kumilos si Abalos kapag ang TU na kaalyado ni Pangulong Gloria Macapagal-Arroyo ang nagreklamo? Bakit kapag ang publiko, ang mga party list candidates at mga GO senatoriables ang umangal ay dedma lang ang komisyuner at ang komisyon sa kabuuan?

Sa inaasal na ito ni Abalos ay lalo lamang pumapangit ang imahe at sumasama ang kredibilidad ng komisyon.

May impresyon na nga na may kinikilingan ang Comelec, tapos ay ganito pa ang ipapakita ni Abalos.

Dapat nga ay magpakitang-gilas ang komisyon para unti-unting mabura ang mantsang iniwan ng ‘Hello Garci’. At bilang pinuno ng Comelec, na dapat ay isang independenteng sangay at tunay na ‘protektor’ ng sagradong boto ng taumbayan, tungkulin nito sa sambayanan na maging parehas, makatarungan at malaya sa lahat ng pagpapasya mula sa impluwensya ninuman.

- end -

<BACK