Pinoy sentensiyado sa Malaysian court

(Michelle Arroyo)

Sampung taong pagkabilanggo ang ibinabang parusa ng Malaysian court sa 20-anyos na Pinoy na pumatay sa kanyang bayaw sa nasabing bansa.

Ito’y matapos akuin ni Mindan Abdul Hamsani ang pagsaksak sa bayaw na si Mukin Hawari, 38, noong Abril 22, 2006 sa kanilang tahanan sa Kampung Sungai Yeh Yeh, Sempora.

Sa kabila ng idinahilan ni Mindan na self-defense ang nangyari, nagdesisyon pa rin ang Sessions Court na ikulong ito.

Ani Mindan, pinagtanggol lamang nito ang ina mula sa pag-unday ng saksak ng bayaw kaya’t sa halip na ang ina ang masawi ay naagaw ni Mindan ang mahabang kutsilyo kay Mukin at sinaksak ito.

Nag-ugat umano ang alitan sa mainit na usapan nina Mindan at Mukin hinggil sa kawalan ng trabaho ng huli.

Mayroong mahigit 20,000 Pinoy sa Malaysia na karaniwang naging migrante na sa loob ng mahabang panahon.

<BACK