Umapela kahapon si Mayor at United Opposition (UNO) president Jejomar Binay kay newly-elected Chinese premier Wen Jiabao na agad na suspendihin ang lahat ng nakabinbing transak­syon ng China sa adminsitrasyong Arroyo.

Ang apela ni Binay ay nakapaloob sa isang liham na ipinadala sa Chinese premier sa pamamagitan naman ni Ambassador Song Tao.

“We urge His Excellency to cause the immediate suspension of all present dealings with President Macapagal-Arroyo and her administration. We believe that a policy of temporary disengagement by Chinese companies from the present Philippine leadership will preserve the good stan­ding and reputation of the People’s Republic of China before the global community, and should likewise further promote the good relations between our two countries,” nakasaad sa sulat ni Binay.

Ayon sa UNO, kinikilala nito ang lahat ng naging tulong ng Chinese government sa bansa subalit ang serye ng mga kontrobersya na sangkot ang administrasyon at ang Chinese firms ay nagbigay daan para kuwestiyunin ang kredibilidad ng mga malalaking proyekto.

“The administration of Mrs. Arroyo has been under severe pressure lately in trying to answer char­ges of various corruption cases that unfortunately, involve companies based in the People’s Republic of China,” ayon pa kay Binay kung saan tinukoy nito ang anomalya sa NBN Broadband project, Cyber-Education project at North Rail and South Rail.

Inimpormahan din ni Binay ang Chinese premier na bagama’t wala pang pormal na imbestigasyon sa nasabing mga katiwaliaan ay mayroon nang “public perception of guilt” sa mga taong sangkot dito pangunahin na si Pangulong Arroyo.

Pimentel nagbabala

Samantala, binalaan ni Senate Minority leader Aqui­lino ‘Nene’ Pimentel ang Malacañang laban sa posib­leng illegal na paggamit nito ng pondo para lamang maibsan ang epekto ng pagtaas ng presyo ng mga pangunahing bilihin partikular ang presyo ng bigas.

Kaalinsunod ito sa pangakong binitiwan ng Pangulo na tulungan ang mahihirap na maibsan ang epekto ng pagtataasan ng presyo ng pangunahing bilihin sa pamamagitan na rin ng pamimigay ng “subsidy coupons”.

Ayon kay Pimentel, maaring maganda umano ang motibo o intensiyon ng Pangulo sa pagtulong sa mga mahihirap na apektado ng kasalukuyang krisis sa supply ng bigas at langis ngunit ang katanu­ngan ay kung ito’y ganap na maisasakatuparan dahil na rin sa usapin ng pondo.

Partikular na kinuwestyon ng senador ay ang pahayag ng Pangulo na pagkukunan nito ng pondo para sa ipapamahaging subsidy coupons ay ang kita nito mula sa Malampaya natural gas at ang P130 bilyon coconut levy funds.

Yap binatikos

Kaugnay nito, umani ng pagbatikos mula sa Pambansang Lakas ng Kilusang Mamamalakaya ng Pilipinas (Pamalakaya) si Agriculture Secretary Arthur Yap dahil sa panukala nito na gamitin ang Simbahang Katoliko sa pagpapamudmod ng bigas.

Sinabi ni Fernando Hicap, national chair ng Pamalakaya na hindi nakakatuwa ang gimik ni Yap dahil magmimistulang NFA warehouse at trading post ng NFA rice ang mga simbahan, church institution at mga parokya.

Gayunpaman, pabor naman si Lingayen-Dagupan Archbishop Oscar Cruz, kilalang kritiko ni Pangulong Arroyo, na wala naman umanong masama kung alukin siya ni Yap na magbenta ng NFA rice sa kanyang diocese.

“Bakit hindi kung makakatulong sa mga taong maralita,” ani Cruz.

Palasyo nagpasaklolo sa NBI

Samantala, inatasan ni Pangulong Gloria Macapagal-Arroyo si Presidential Anti-Smuggling Group (PASG) Chief Antonio Villar na makipag-ugnayan sa Nbational Bureau of Investigation sa isasagawang major operations laban sa mga rice smugglers at hoarders ngayong linggo sa Visayas at Mindanao.

Aminado ang Malacañang na maliban sa PASG ay malaki ang maitutulong ng NBI sa pagsawata sa mga hoarders at rice smugglers partikular yaong malalawak na ang koneksyon sa naturang ilegal na aktibidad.

Bubusiin din ng Department of Justice (DOJ) ang mga umano’y ano­malya sa likod ng hoarding at iba pang ilegal na aktibidad na may kinalaman sa pagbebenta ng bigas, ayon kay Justice Secretary Raul Gonzalez.

Sa kabilang dako, iginiit naman ng Pambansang Lakas ng Kilusang Mamamalakaya ng Pilipinas (PAMALAKAYA) sa Senado at Mababang Kapulungan ng Kongreso na imbestigahan ang inilaang P4.2 bilyon pondo para sa Ginintuang Masaganang Ani (GMA) ng DA.

Ayon kay Gerry Corpuz, Spokesman ng PAMALAKAYA, ang naturang pondo ay ginamit na pambili ng 407,000 sako ng hybrid rice seeds at 225,000 certified rice seeds noong nakaraang taon. (Tina Mendoza/Eralyn Prado/Rose Miranda/Grace Velasco/Juliet de Loza)