• CALAMITY FUND IBUHOS SA BIGAS
• Interfaith prayer para kay Cory
• Bishops pinulong ni GMA
• Palasyo yanig sa NPA
• Prexy power sa pag-uupo ng SC justice alisin
• SEY NG MASA: Sa kinakaharap na krisis sa bigas

Habang ginigiyera ng pamahalaan ang mga rice hoarders at mga sangkot sa NFA rice rebagging, iginiit kahapon ni Sen. Mar Roxas na dapat ding ilabas na ang calamity fund ng mga local government units (LGUs) upang magamit sa mga programang pansakahan bilang ‘immediate solution’ sa dinaranas na krisis sa bigas.

Ito ay isa sa 4-point action plan na ipinanukala ng senador sa gitna ng dinaranas na krisis sa bigas kasabay ng paghamon sa pamahalaan na sana ay hindi propaganda o ‘pagpapapogi’ lamang ang inisyal na aksyon ng pamahalaan na suspendehin ang dalawang opisyal ng National Food Authority (NFA) sa Isabela na hinihinalang nakikipagsabwatan sa mga tiwaling negosyante upang palitawin at ibenta bilang commercial rice ang mga NFA rice sa pamamagitan ng pagpapalit-sako o rebagging.

Iginiit din ni Roxas na dapat na sundan ng pagsasampa ng mabigat na kaso ang aksyong ito at patuloy na imbestigahan ang iba pang nasasangkot na opis­yal sa iba pang bahagi ng bansa.

Ikinatuwa rin ni Ro­xas ang para sa kanya’y kauna-unahang pag-amin at pagharap ng Malacañang at ni Agriculture Sec. Arthur Yap sa problemang dinaranas ng bansa.

“Sa wakas, kinikilala na din ni Sec. Yap na totoong may problema sa supply ng bigas. Sa wakas, ina­amin na nila na may diversion ng NFA rice na nagaganap lalo na sa probinsya,” ani Roxas matapos na ipanukala ng kalihim ang pagsasagawa ng ‘open house’ discussion kasama ang Kongreso upang bumalangkas ng mga posibleng solusyon sa problema kahit pa umano masasabing ‘long overdue’ na ito.

Sa kanyang sariling opinyon, sinabi ng mamba­batas na maganda ang ginagawang pagbabantay at pag-usig sa mga rice hoarders at NFA rice rebaggers ngunit hindi umano ito sapat para agad na mapataas ang supply ng bigas na siyang problema ngayon ng bansa.

Kabilang sa 4-point action na inilatag ni Roxas ay ang: 1) agarang pagpapalabas ng calamity fund ng mga LGUs upang maitapal sa pangangaila­ngan ng mga magsasaka tulad ng binhi, abono at pesticides na magreresulta ng mas masaganang ani; 2) pag-eestablisa ng LGUs ng food security early warning mechanism upang maiprayoridad ang mga bata at matatanda sakaling magkaroon talaga ng krisis sa supply ng bigas; 3) muling pagsusulong ng peace talks sa mga rebelde upang masaka ang mga bukirin sa tinatawag na ‘conflict areas’; at 4) paglikha ng special investigating at prosecutorial teams para tutukan, arestuhin at usigin sa korte ang mga hoarders, profiteers, mga miyembro ng rice cartel at ang nauusong NFA rice rebaggers.

Kaugnay nito, umalerto na rin ang Caloocan City Police sa mga reklamo laban sa mga NFA rice rebaggers at profiteers sa lungsod.

Matapos makatanggap ng reklamo ay agad umaksyon ang lokal na pulisya kung saan mismong ang mga opisyal nito ang rumiresponde at nagbeberipika ng natatanggap na mga impormasyon.

Samantala, kinuwes­tyon naman ni Senate President Manny Villar ang diumano’y overpriced na P8 bilyong irrigation pro­ject ng pamahalaang sa taong ito. Kaduda-duda umano kung paano ginastos ang napakalaking halaga sa iilang lupang sakahan na lamang sa bansa.

Wala umanong duda na mahalagang mapondohan ang pangangailangang ito sa patubig ngunit base sa pag-aaral ni Villar ay lubhang mataas ang halagang ito sa aktuwal na gastusin. At kung tunay umanong nagastos sa tamang pinaglaanan ang pondo ay hindi magkakaroon ng krisis sa bigas dahil sobra-sobra ang perang ito upang mapasigla ang ani ng mga magsasaka.

Halos ganito rin ang sentimiyento ng mga militanteng magsasakang nag-rally kahapon sa tapat ng NFA office.

Ayon sa Kilusang Magbubukid ng Pilipinas (KMP), ang kawalan ng konsensya ng pamahalaan na mapangalagaan ang interes ng maliliit na magsasaka at mamamayan ang tunay na ugat ng krisis sa bigas.

Mas pinaboran pa umano ng gobyerno ang mga dayuhan sa pamamagitan ng pagtangkilik sa iniimportang bigas sa halip na patatagin ang produksyon sa mga lupang sakahan.

Isa naman sa solusyon na inilatag ng KMP ay ang pagpapataas ng 25% sa laang pondo ng pamahalaan para sa procurement o pagbili ng palay mula sa mga magsasaka kaysa patuloy na paboran ang malawakang rice importation.