Panahon na upang ipatupad ng pamahalaan ang ‘price
control’ sa bigas upang maprotektahan ang interes ng sambayanan.
Ito ang iginiit kahapon ng militanteng grupong Kilusang Magbubukid
ng Pilipinas (KMP) bilang solusyon sa pinangangambahang pagsasamantala
ng mga tiwaling negosyante sa dinaranas na krisis sa bigas.
Hinirit din ni KMP chairman Rafael Mariano na dapat na ilagay sa
price ceiling na P25 kada kilo ang bigas dahil ito lamang ang kaya
ng bulsa ng malaking populasyon ng bansa.
Kasabay nito, hiniling din ng grupo na itaas sa P15 kada kilo ang
bilihan ng palay sa mga magsasaka mula sa dating P12/kilo upang
maengganyo muli ang sektor na pasiglahin ang kanilang ani.
Kasabay nito, iginiit din ng KMP ang agarang pagpapaimbestiga kay
Department of Agriculture (DA) Sec. Arthur Yap dahil naniniwala
silang malaki ang kasalanan ng kalihim sa pagkakaroon ng rice shortage
ngayon sa bansa. Nakahanda silang tapatan ito ng serye ng protesta
hangga’t walang positibong tugon ang pamahalaan sa kanilang
hiling.
Ilan sa mga paratang ng grupo ay ang pagpapabaya umano nito sa tungkulin
tulad ng pagbalewala sa mga ulat na pagbebenta ng National Food
Authority (NFA) rice bilang commercial rice sa mga lalawigan ng
Isabela, Cagayan de Oro at Cebu bilang pakikipagsabwatan diumano
sa mga tiwaling rice traders.
Sa panig naman ni Senate minority leader Aquilino Pimentel
Jr., pinagpapaliwanag nito si Yap sa ulat na ang biyenan nitong
si Jimmy Gaw ay nasa negosyo ng cereal distribution sa bansa.
Ito umano ay malinaw na ‘conflict of interest’ sa paghawak
ni Yap sa posisyon bilang kalihim ng DA.
Samantala, pinarerepaso ni House Speaker Prospero Nograles ang umiiral
na Price Act upang patawan ng mas mabigat na parusa ang mga magsasamantalang
negosyante sa presyo ng bigas at maging sa mga produktong petrolyo.
“It’s time we revisit Republic Act 7581 or the Price
Act to determine how to further discourage, if not totally end,
illegal acts of manipulating the prices of any basic commodity especially
during such time that government is dealing with the continuing
rise in the prices of fuel and rice,” anang kongresista.
Mula sa Makati City, muling iginiit ni Mayor Jejomar Binay na dapat
nang tapusin ng Malacañang ang pagsisinungaling at pagtatakip
sa tunay na sitwasyon ng bigas sa pagsasabing ang kailangan ngayon
ng bansa ay, “more rice, less lies.”
Isinisi pa nito na malaki ang papel sa problema ngayon ng bansa
ng ginawang diversion ng P728 milyong fertilizer fund sa kampanya
ng mga taga-administrasyon sa eleksyon.
May sinisisi rin si Bayan Muna party-list Rep. Satur Ocampo
sa nangyayaring krisis sa bigas at ito ay ang implimentasyon ng
Agriculture and Fisheries Modernization Act (AFMA).
Naging palpak umano ang gobyerno sa pagpapairal ng naturang batas
dahil itinuon nito ang atensyon sa pagpapalakas ng export-oriented
at import-dependent na uri ng agrikultura sa Pilipinas. Ang resulta:
hindi na sapat ang sariling produksyon para sa panloob na pangangailangan
at nakadepende na ang bansa sa produkto ng ibang bansa.
Bilang solusyon naman, naghain ng panukalang batas si Nueva Ecija
Rep. Edno Joson, ang House Bill 794 o Rice Importation Privatization
Act, na naglalayong isapribado ang pag-aangkat ng mga food products
kasama na rito ang raw materials, equipment at pasilidad para sa
pagmamanupaktura ng pagkain.
Sa ngayon ay ang NFA ang sumasaklaw sa kapangyarihan at tungkuling
ito sa bias ng Presidential Decree 1770.
|
