Hindi dapat magsayang ng pangunahing butil upang
makaiwas sa sinasabing nakaumang na problema sa bigas.
Ito ang isa sa mga solusyong itinutulak ng Malacañang sa
nasabing problema bagama’t pinaninindigan pa rin nito na walang
krisis sa supply ng naturang butil.
“Siguro, dapat ang ating mga kababayan ay dapat maging impormado
na may problema tayo kung kaya kailangan na dapat ay ubusin ang
nasa pinggan at huwag magtira,” ani deputy presidential spokesman
Lorelei Fajardo sa isang panayam kahapon sa radyo.
Suporta pa rin ito sa nauna nang pagsang-ayon ng palasyo sa ulat
ni Agriculture Sec. Arthur Yap na 30% ng inihahaing kanin sa hapag-kainan
sa bawat tahanan at maging sa mga restaurant at fastfood chains
ay natatapon lang sa basurahan.
Binigyan-diin ng palasyo na hindi dapat takaw-mata ang mga kababayan
upang hindi magkaroon ng kakapusan ng supply ng bigas sa hinaharap.
Ngunit binigyan-diin ni Senate President Manny Villar na, “Hindi
ang nasasayang na kanin sa bawat mesa ang problema kundi ang palay
na nauubos sa lansangan kung saan pinatutuyo ang mga ito. Ang deperensya
ay wala sa kinaugalian nating pagkain kundi ang maling prayoridad
ng gobyerno.”
Ipinunto ng senador na kung mayroong tamang pasilidad na ipinagagawa
ang pamahalaan para magsilbing bilaran o patuyuan ng palay ay walang
masasayang na ani.
Takipan pa rin!
Sa panig naman ni Sen. Mar Roxas, chairman ng Senate committee on
trade and commerce, patuloy nitong binabatikos ang pamahalaang Arroyo
sa ginagawang pagtatakip sa nakaambang rice shortage sa bansa sa
pamamagitan ng pambobola sa taumbayan sa anyo ng propaganda.
Sinegundahan din ni Roxas ang teyorya ni Villar na hindi pinaprayoridad
ng gobyerno ang pagpapalago sa agricultural products.
Binakbakan din ni Roxas ang linya ng Malacañang na walang
problema sa supply ng bigas habang ipinauunawa sa publiko na hindi
maiiwasang tumaas ang presyo nito. “Ibig sabihin ay policy
na ng gobyerno na pataasin, gawing mas mahal ang bigas,” anang
senador.
Tiba-tiba
Sa panig nina Sen. Francis ‘Chiz’ Escudero at Rep. Jose
Solis, hindi lamang ang nakaambang krisis sa supply ng bigas ang
pinangangambahan ng mga ito kundi higit ay ang pagsasamantala ng
ilan sa problema.
Kahit ngayong may sapat pang imbak ng bigas ay pahirapan na umanong
makakuha ng supply ang maliliit na retailers kung saan maging sa
National Food Authority (NFA) ay hindi na basta-basta nakakabili.
P30 pataas na
Kinumpirma kahapon ng ilang rice dealers at retailers sa Metro Manila
na hindi na bumababa sa P30 kada kilo ang presyo ng bigas at ito
ay presyong kuha nila at papatungan pa kapag ibinenta sa publiko.
“Kawawa po ang ilang bumibili na hindi kasya ang pera nila.
‘Yung iba nakikiusap na ibaba ang presyo pero wala po kaming
magagawa talaga,” ani Aling Rufina Sarmenta, rice dealer sa
Blumentritt St., Manila.
Sa isang kalapit na NFA-accredited rice dealer, wala na ring tig-P22
hanggang P25 kada kilo na bigas at ayon sa nagbabantay dito, hinihintay
pa umano nila ang susunod na delivery at walang kasiguruhan kung
magkano na ito bawat kilo.
Nagbabala naman si Sen. Juan Miguel Zubiri na maaaring sumampa pa
sa P40 bawat kilo ang presyo ng ordinaryong bigas kung hindi mapupunan
ng Department of Agriculture ang rice shortage sa bansa.
Basagin ang kartel
Kaugnay nito, iginiit ni Bayan Muna party-list Rep. Satur Ocampo
ang agarang pagbuwag sa rice cartel sa Pilipinas bilang isa sa epektibong
solusyon sa problema.
Bukod sa seryosong pagbasag sa kartel, kailangan din umanong palakasin
ang procurement capacity ng NFA at dagdagan ang ‘farmgate
prices’ ng palay.
Si Palawan Rep. Abraham Mitra, sa kabilang dako, ay nagmungkahing
obligahin ng pamahalaan ang top 100 corporations sa bansa na magtanim
ng palay para sa konsumo ng kanilang mga empleyado at pamilya ng
mga ito.
Rice coupons
Mula sa DA, sinabi ni Sec. Yap na handa umano ang pamahalaan na
sumaklolo sa mahihirap na pamilyang hindi na kayang bumili ng bigas
dahil sa lumolobong presyo nito.
Nakikipag-ugnayan na umano ang kanyang tanggapan sa Department of
Social Welfare and Development (DSWD) na siyang mangangasiwa sa
pamamahagi ng rice coupons at food stamps sa mga mahihirap na pamilya.
Ang mga kupon at stamp ay magagamit umano sa mga government-authorized
food outlets upang ipalit ng bigas at pagkain.
|
