Lalarga na bukas ang national women’s football team upang sumabak sa ikalawang round ng Asian Women’s Cup sa Marso 24 sa Nakhon Ratchashima, Thailand.

Ang mga Pinay booters ay sasalang sa 4-nation single-round tournament, na gaganapin sa His Ma­jesty the King’s 80th Anniversary Football Stadium, kung saan dalawang slots ang pag-aagawan para sa Asian Women’s Cup.

“We don’t expect any miracles. But this doesn’t mean we won’t be out there fighting. Definitely, this won’t be a vacation for the girls,” ani head coach Hans Smit.

Aminado naman si Smit na hindi magiging madali ang laban ng team lalo pa’t walang pang isang buwan ang pagkakabuo ng kanilang lineup dahil na rin sa komitment ng mga manlalaro nilang UAAP varsity habang ang iba nilang booters ay mula sa kani-kanilang overseas stints.

“This is no excuse but the reality we have to deal with,” dagdag pa ng La Salle mentor, na ang hu­ling international coaching venture sa RP squad ay noong 2004 Asian Under-19 tournament sa China.

Kahit mga baguhan ang karamihan sa kanyang roster, umaasa pa rin si Smit sa pagbandera ng kanyang veteran core na kinabibilangan nina strikers Edna Agravante at Fil-Am Angie Empelido, midfielders Natasha Alquiros, Merlou Albano, Marielle Benitez, Samantha Nierras at defender Josephine Luto.

Kabilang naman sa mga overseas reinforcement ng team si Filipino-Canadian defender Mallory Dayot, miyembro ng RP squad na nagpabagsak sa Hong Kong sa unang round noong Oktubre 2007.

Agad na masusubukan ang kakayahan ng Nationals kontra Asian soccer powerhouse South Korea sa Marso 24, kasunod ang host Thailand sa Marso 26, at pinakahuli ang Malaysian team sa Marso 28.

“We hope to limit South Korea’s goals to a minimum and hopefully launch some counterattacks of our own. The same with the Thais. I believe we can beat Malaysia,” pahayag ni Smit sa gagamitin nilang overall game plan.