ASTANA, Kazakhstan --- Rumatsada ng come-from-behind victory si Orlando Tacuyan Jr., at malinis namang dinispatsa ni Godfrey Castro ang nakaharap sa pagpapatuloy ng final AIBA Olympic Boxing Qualifying Tournament sa Sports Palace dito Martes ng gabi.

Nagpatama ng tatlong matitinding hit ang 19-anyos na si Tacuyan sa huling 10 seconds para itakas ang 14-13 pananaig kontra kay Chung Chu­n-an ng Taiwan.

Pinatunayan naman ni Castro na karapat-dapat siyang maging last-minute replacement kay Violito Payla nang kumbinsidong paluhurin si Glesidin Saliev ng Kyrgiztan tungo sa 29-9 panalo.

Pinalitan ni Castro si Payla limang araw bago tumulak patungong Kazakhstan ang RP SMART-PLDT boxing team.

Bahagyang nalambu­ngan ang kambal na panalo dahil sa bugbog na inabot ni light flyweight Delfin Boholst mula sa mga kamao ni Mongolian Uranchimeg Munkh-Erdene. Talo si Boholst, 25-14.

Naghahabol sa 10-12 ang kaliweteng si Tacu­yan pagkatapos ng tatlong rounds, at baon pa din sa 11-13 papasok ng final minute ng four-round bout.

Hindi pa naintindihan ni Tacuyan ang senyas ni head coach Pat Gaspi sa Blue Corner, inakala ng boksingero na lamang siya ng dalawang puntos kaya biglang sinayawan palayo ang Taiwanese.

Dahil sa sigaw ng crowd at mga teammates para umatake, naisip ni Tacuyan na kailangan niyang umiskor ng mas maraming puntos para manalo.

Sa papaubos na sandali, ibinigay na ni Tacuyan lahat ng nalalabing lakas. Nagtangkang umatras ang Taiwanese pero inabot ng tatlong malalakas na kaliwa sa mukha kasunod ng pagtunog ng final bell.

Umaasa si Lopez na magtutuloy-tuloy ang ma­gandang ipinapakita ng RP SMART-PLDT team kasunod ng dalawang ma­laking panalo.

Bagama’t kinailangan ni Tacuyan ng ‘great escape’ para umabante sa quarter­finals laban kay Kim Won Duk ng North Korea sa Last 8, pinupog naman ni Castro si Daliev.

Nalamog ang mukha at katawan ng Kyrgiztan fighter sa mga solidong kaliwa’t kanang kumbinasyon ni Castro para sa matikas na panalo tungo sa pakikipagtipan kay Taiwanese Liu Shi-jung sa quarterfinals.

Tinalo ni Won si Indonesian Arenaldo Moniaga habang nilaktawan naman ni Liu si Rouholla Bakshian ng Iran.

Ibinuhos ni Boholst ang lakas sa unang dalawang rounds pero nanghina sa atake ng agresibong si Munkh-Erdene. Sinamahan ni Boholst na manonood na lang sa sidelines ang teammate na si Joan Tipon.

Ang top bet ng bansa na si Tipon ang unang napa-exit dahil sa nakapanlulumong 30-8 pagka­talo kay H. Todjivayev ng Uzbekistan noong Lunes.

Nasungkit ng RP SMART-PLDT team ang first quarters berth sa likod ng malaking panalo ni lightweight Genebert Basadre laban kay Paulus Paunandes ng Malaysia, 21-2.