Pinakawalan na ng Manila Police District (MPD) ang tatlong miyembro ng Tau Gamma Phi na dinampot sa naganap na explosion sa harap ng La Consolacion College sa Mendiola, Manila.

Ito ay matapos mabigo ang ilang testigo na ma-identify kung sino sa kanila ang naghagis ng pillbox na nagresulta ng pagkasugat ng 15-katao kabilang ang dalawang security guard ng La Conslacion College at Holy Spirit.

Kabilang sa mga dinampot ng MPD sina James Ken Hagmen, Joseph de Vera, 4th year student, at Vincent Ferdinand Pangilinan, pawang miyem­bro ng Tau Gamma Phi at estudyante ng Centro Escolar University (CEU).

Ang tatlo ay dinampot matapos makitang tila may inaabangan sa naturang lugar pero pinakawalan din nang hindi matumbok na siyang naghagis ng sumabog na pillbox.

Nanatiling blangko ang MPD na makilala ang nasa likod ng naganap na pagpapa­sabog sa harapan ng gate ng La Consolacion College.

Bagama’t patuloy ang mga awtoridad sa pag-iim­bestiga sa kaso kung saan nakasentro ang imbestigasyon sa frat war.

Samantala, hiningi na ng Manila Police District (MPD) ang tulong ng Land Transportation Office (LTO) para makilala ang mga nasa likod ng explosion.