Nagsimula nang mag-usisa ang taumbayan
kung ano talaga ang sitwasyon ng Pilipinas sa usapin ng supply ng
bigas makaraang magsi-mulang maramdaman ang sunud-sunod na pagtaas
ng halaga nito.
Kasabay nito, kinastigo ni Sen. Mar Roxas, chairman ng Senate committee
on trade and commerce, ang sa tingin niya ay ‘cover-up’
o pagtatakip na ginagawa ng pamahalaan, sa pangunguna
ng Department of Agriculture (DA), sa kinakaharap na problema ng
bansa.
“Sa totoo lang, may krisis talaga (sa bigas). Hindi lang inaamin
ng gobyerno e. Halos kada dalawang araw, tumataas ang presyo ng
binibili kong bigas. Biruin mo ‘yung P20, P30 kada sako na
increase every other day? Mabigat talaga ‘yon. Sa awa ko nga
sa mga bumibili, hindi ako agad nag-a-adjust ng presyo. Ako na lang
ang nagso-shoulder. Nakakaawa ang tao. Kaya lang, hanggang kelan
ko lang kaya mag-absorb ng price increase na ito. Tapos sasabihin
nila walang krisis,” ani Ron, isang rice retailer sa Pandacan,
Manila.
Naniniwala ang rice retailer na ito na may problema na talaga sa
supply dahil ito lang naman ang puwedeng maging dahilan ng halos
arawang pagsirit ng halaga nito.
Kahapon ay pinanindigan ni Pangulong Gloria Macapagal-Arroyo na
walang shortage sa supply ng bigas ngunit hindi umano talaga maiiwasan
ang pagtaas ng presyo nito.
“Medyo mas mamahal nang kaunti pero walang shortage. Tuluy-tuloy
ang supply,” anang Pangulo bilang pag-echo sa nauna nang pahayag
ni DA Sec. Arthur Yap.
Sa paliwanag ni Arroyo, epekto umano ito ng paggalaw ng presyo ng
bigas sa pandaigdigang merkado at bilang taga-angkat ng pangunahing
butil ay talagang masasagasaan ang Pilipinas ng rice price hike.
Sa obserbasyon naman ni Roxas, halatang mayroong itinatago si Yap
hinggil sa rice shortage nang patuloy nitong itanggi na walang kakapusan
sa sup-ply ng bigas subalit hinihikayat naman ang mga restaurants
at fastfood chains na magsilbi ng kalahating order o takal ng kanin
sa kanilang mga kostumer maliban sa nakasanayang isang buong order.
“’Yung Secretary of Agriculture ay nagsasabi na kailangang
magkalahating kanin na lang tayo, tapos sasabihin na wala tayong
problema. Kailangang tanggapin natin na may problema tayo para
makausap tayo at makahanap ng solusyon,” diin ni Roxas.
“’Yung Thailand ay hindi na makaka-commit sa atin. Ang
Vietnam naman ay nagsasabi na hanggang kalahati lang ng ating pangangailangan
ang mabebenta nila. So, it’s not just a question of price,
it’s a question of supply,” paliwanag pa ni Roxas.
Binatikos din nina Senate minority leader Aquilino Pimentel
Jr. at Sen. Francis ‘Chiz’ Escudero ang ‘half-rice
solution’ ni Yap dahil hindi dapat na ang sambayanan ang magsakripisyo
habang patuloy na nakikinabang ang mga negosyanteng miyembro ng
‘rice cartel’.
“Ang pigilan ni Sec. Yap ang nakawan sa NFA (National Food
Authority) at ayusin niya ang rice production,” diin
ni Pimentel.
Napailing din si Escudero sa solusyon ng kalihim na ang demand ang
kontrolin kaysa solusyunan ang problema sa supply.
“They should address and plan for the supply, price and security
side, not the demand side. The latter is more difficult to control,”
suhestyon naman ng neophyte senator.
Ngunit hanggang kahapon ay patuloy na sinisiguro ni Yap na hindi
magkakaroon ng kakapusan ng pagkain sa bansa sa kabila ng pandaigdigang
‘climate change’ na siyang pinag-uugatan ng paghina
ng ani ng mga pananim, partikular ng palay.
Habang naka-secure umano ang unang dalawang buwang supply, inaayudahan
na rin umano ng kanyang tanggapan ang mga magsasaka upang mapataas
ang produksyon ng mga ito at maabot ang puntiryang 17.33 milyong
metriko toneladang ani (bigas) para sa buong taong konsumo ng sambayanan.
Isa naman sa nakikitang remedyo ni AGAP partylist Rep. Nicanor Briones
ay ang pagkakaloob ng kinakailangang pondo sa DA upang matustusan
ang lahat ng ‘food production program’ nito.
Para naman sa Kilusang Magbubukid ng Pilipinas (KMP), isang makatotohanang
agrarian reform program ang tanging solusyon sa nakaambang food
crisis.
|
