MAY problema sa letters ‘B’ at ‘P’ si Janina San Miguel, ang newly-crowned Bb. Pilipinas-World. Nang mainterbyu namin si Janina, showviz ang bigkas niya sa showbiz word at nang mag-guest siya sa Showbiz Central noong Linggo, letrang ‘F’ ang kanyang pagkakabigkas sa isang salita na may letter ‘P’.

Kung magiging conscious si Janina sa pagbibitaw ng salita, maiiwasan, mababawasan o magagamot ang kanyang problema sa letra.

***

Tatlong beses naming pinanood ang laban nina Manny Pacquiao at Juan Manuel Marquez sa Las Vegas noong Linggo. Una naming pinanood ang kanilang boxing match sa Cinema 1 ng Gateway Mall dahil mas thrilling manood kung nagsisigawan ang mga tao sa loob ng sinehan sa tuwing nakakapuntos si Manny laban kay Marquez.

Tumatahimik ang audience kapag dehado si Manny dahil sa takot na baka mapatumba o ma­talo siya ng kanyang kalaban.

Natapos ng 12:15 p.m. ang live coverage sa mga sinehan ng boxing match nina Pacquiao at Marquez kaya naabutan pa namin ito na nag-uumpisa pa lang sa GMA 7 (2:00 p.m.) nang makauwi kami ng bahay.

Kinagabihan, nagkaroon ng replay sa RPN 9 ang Pacquiao-Marquez at muli namin itong pinanood para aming makuha ang kumpletong pangalan ng 14-year-old Fil-Am-Mexican girl na umawit ng US National Anthem sa nabanggit na laban.

Jasmine Villegas ang pangalan ng magandang bata na mahusay kumanta at nakatira sila ng kanyang pamilya sa San Jose, California.

Twelve years old si Jasmine nang ma-discover siya ng entertainment entrepreneur at super-producer na si Damon Dash.

Si Damon ang nag-launch ng singing career nina Jay-Z, Kanye West at Cam’ron.

Ikinukumpara ang singing talent ni Jasmine sa mga sikat na American singer tulad nina Alicia Keys at Whitney Houston.

Sa isang interbyu kay Dash, sinabi nito na naniniwala siya na gagawa ng history sa US music scene ang young Fil-Am singer.

“I only want to affi­liate myself with people that will make history… I truly believe in my heart, Jasmine Villegas will make history,” ani Dash sa artikulo na inilabas ng Asian On-line Journal.

Bukod sa pagkanta, print ad at commercial model sa Amerika si Jasmine. Siya ang print ad girl ng Target, Mary Kate and Ashley, American Girl, Levi’s at Hilary Duff.

Lead role siya sa mga commercial ng Chevrolet, Marshalls at McDonald’s.
Nag-guest na si Jasmine sa Disney’s “That’s So Raven,” at “My Wife and Kids” ng Touchstone Pictures.

***

Napagod sina Lorna Tolentino at Rudy Fernandez sa biyahe nila sa Las Vegas. Sa text message na natanggap namin mula kay Lorna, pabalik na sila ni Rudy sa Los Angeles para sa doctor’s appointment ng kanyang asawa.

Pumunta muna sila sa Las Vegas para panoorin ang laban nina Pacquiao at Marquez na ikinapagod nila.

Magpapagamot sa US si Rudy kaya dalawang buwan silang mawawala sa Pilipinas ni Lorna. Babalik sila sa May.

***

Hindi crime free ang Metro Manila noong Linggo habang nagpapa­litan ng matitinding suntok sina Manny at Juan Manuel.

Ipinakita kahapon sa Unang Hirit ang video report tungkol sa bus na hinoldap sa kahabaan ng Edsa. Nasamsam ang mga personal na gamit ng mga pasahero at may mga nasaktan sa kanila dahil sa pananakot ng mga holdaper na may bomba sa loob ng sasakyan.

Dati-rati, walang krimen na nagaganap sa Metro Manila sa mga nakaraan na laban ni Mannny.

***

Sanggol na babae ang isinilang ng 41-year-old actress na si Halle Berry noong Linggo (March 16) sa Cedars-Sinai Hospital, Los Angeles.

Ang baby girl ang pa­nganay ni Halle at ng kanyang 32-year-old mo­del boyfriend na si Gabriel Aubry.

***

Comments are welcome at jojogabinete@yahoo.com.