Iniluklok bilang pinakabagong mahistrado
ng Korte Suprema si Labor Sec. Arturo Brion at agad itong nagdeklara
ng kahandaang makibahagi sa deliberasyon ng kontrobersyal na isyung
bumabalot sa ini-invoke na ‘executive privilege’ ni
CHED Chairman Romulo Neri.
“I’m a full member of the Court now and I’m willing
to participate (in the deliberations),” ani Brion sa isang
ambush interview sa Korte Suprema nang agad na manumpa kay Chief
Justice Reynato Puno pagkababang-pagkababa ng kanyang appointment
mula sa Malacañang.
Hindi sana aani ng atensyon ang kapuna-punang pagmamadali ni Brion
na makapanumpa at makibahagi agad sa deliberasyon ng Supreme Court
(SC) patungkol sa isyu ng ‘executive privilege’ invocation
ni Neri kung umugong mismo sa Malacañang ang balitang tabla
sa botong 7-7 ang mga mahistrado ng kataas-taasang hukuman sa petisyon
ng Senado hinggil sa pagdalo ni Neri sa NBN-ZTE probe kung saan
ini-invoke ng huli ang ‘executive privilege’ para protektahan
ang ilang impormasyong may kinalaman sa komunikasyon nila ni Pangulong
Gloria Macapagal-Arroyo patungkol sa kontrobersyal na broadband
project.
Sa pagpasok ni Brion, lumakas ang hinalang tuluyan nang malulumpo
ng palasyo ang SC na magbibigay-daan sa desisyong paborable sa executive
branch at kontra naman sa interes ng Senado, anang isang insider.
Ngunit mabilis na nilusaw nina Executive Sec. Eduardo Ermita at
Press Sec. Ignacio Bunye ang mga walang basehang hakahaka.
“Supreme Court Justice Arturo Brion brings with him a wealth
of experience as a public servant and legal luminary. He is a man
of proven integrity and independence...with probity, patriotism
and competence,” diin ni Bunye na agad namang sinegundahan
ni Ermita ng mga pahayag na hindi dahil appointed ng Pangulo si
Brion ay tama nang kuwestyunin ang kredibilidad at pagiging independent
ng mga SC justices sa kabuuan.
Umaabot na sa 12 mahistrado ang naiupo ni Arroyo sa buong panahon
ng kanyang panunungkulan sa palasyo.
Nauna nang ipinaliwanag ni Atty. Midas Marquez, tagapagsalita ng
SC, na makakasali lamang sa botohan ang bagong luklok na mahistrado
kung nakasama ito sa deliberasyon ng kaso hinggil sa legalidad ng
paggamit ni Neri ng ‘executive privilege’ sa kanyang
Senate appearance.
Ngunit hindi naman matiyak kung muling tatalakayin sa en banc session
ngayong araw ang tungkol sa kontrobersya.
Si Brion ay pumalit sa puwestong binakante ni Justice Angelina Sandoval-Gutierrez
na nagretiro noong Pebrero 27.
Ipinalit naman kay Brion sa Department of Labor and Employment (DOLE)
sa acting capacity si Overseas Workers Welfare Administration (OWWA)
Administrator Marianito Roque.
|
