Isinantabi ng mga Filipino ang problema sa pulitika kahapon at nagkaisang ipinagdiwang ang pagka­panalo ni boxing superstar na si Manny Pacquiao sa WBC super-featherweight laban kay Mexican contender Juan Manuel Marquez sa WBC super-fea­therweight fight sa Mandalay Bay, Las Vegas.

Ang mga construction worker sa Lungsod ng Makati ay nag-umpukan upang makinig ng live broadcast sa radio kaugnay sa laban at naghihiyawan sa labis na katuwaan nang ihayag ng mga judges ang split decision pabor kay Pacquiao.

Ang military na unan­g nagdeklara ng special cease­fire upang makapanood ang mga sundalo sa laban, ay naglagay ng giant screen sa mga army headquarters.

Maging ang rebeldeng Moro Islamic Liberation Front (MILF) ay pansamantalang nagluwag sa kanilang pagpapatrolya para manood ng boxing.

Samantala, nagmistulang “ghost town” naman ang maraming bahagi ng Zamboanga City kahapon dahil sa laban ni Pacquiao laban kay Marquez.

Nagtumpukan ang ma­raming mga manonood, parti­kular ang ordinar­yong tagahanga ni Pacquaio na mga tricycle at jeepney driver sa iba’t ibang kai­nan at ang iba ay nasa sinehan at hotel.

Masaya ang naging laban para sa maraming mga taga-hanga ni Pacquiao sa Zamboanga City ngunit dahil sa kilalang sugarol ang mga Chabacano ay nauwi sa pustahan ang laban nina Pacquiao at Marquez.

Mustulang sabong ang boxing at kaliwa’t-kanan ang sigawan sa pustahan.

“Katuwaan lamang itong pustahan,” ani naman ng isang “kristo” na nagpa­kilalang lamang sa panga­lang Jason.

Umabot umano sa 400 ang kumisyon at balato na nakuha ni Jason sa pusta­han. Wala rin inulat na krimen sa Zamboanga City sa ilang oras ng labanan kahapon katulad ng inaasa­han ng pulisya.

Sa Palasyo, nagmistulang pista naman ang senaryo sa buong Malacañang dahil sa panalo ni Manny Pacquiao kontra kay Marquez.

Ikinuwento ni Deputy Presidential Spokeswoman Lorelei Fajardo na personal na tinututukan at pinanoood ni Pangulong Gloria Macapagal-Arroyo ang laban at masayang-masaya umano ang huli dahil sa tagumpay ng boksingero at sa nangyaring muling pagkakaisa ng bayan dahil sa nasabing laban.

Bukod dito ay napag-alaman na personal na tinawagan ni Pangulong Arroyo si Pacquiao, ilang sandali matapos ang panalo nito, upang saglit na batiin.

GMA nag-emote

Kaugnay nito, inihalintulad ni Pangulong Arroyo ang kanyang pakikibaka sa aniya’y “sweet victory” o “matamis na tagumpay” ni Manny Pacquiao kontra Marquez.

Sa kanyang opisyal na mensahe kaugnay ng panalo ni Pacquiao, paniwala si Pangulong Arroyo na tulad ng boksingero ay makakaya din ng kanyang liderato at buong bayan ang anumang pagsubok. (With AFP)