Pinadadalo ng abogado ng walong junior officers na miyembro ng Magdalo group sa Makati Regional Trial Court (RTC) si Pa­ngulong Gloria Macapagal-Arroyo at 10 iba pa sa susunod na paglilitis upang tumestigo para sa ikakapawalang-sala ng mga Magdalo soldiers.

Sa inihaing mosyon ni Atty. Ernesto Francisco sa sala ni Makati RTC Judge Oscar Pimentel ng Branch 148, hiniling niya na i-subpoena ng korte ang Pangulo at 10 pang personalidad.

Sinabi ni Francisco na mahalagang humarap ang Pangulo sa korte upang mailahad ang naganap nilang pagpupulong noon ni dating Navy Lt. at ngayo’y Sen. Antonio Trillanes IV kaugnay sa banta sa buhay ng huli at kung papaano ito inilagay sa proteksiyon ng pamahalaan bunga ng naturang pagbabanta.

Kailangan din aniyang kumpirmahin ng Pangulo ang katotohanan sa likod ng paglalabas niya ng Executive Order No. 3 noong Pebrero 2001 at Memorandum of Instructions noong Pebrero 11, 2003 kaugnay sa naganap na pambobomba sa Davao at Cotabato.

Naniniwala si Francisco na makakatulong ang testimonya ng Pangulo upang mapawalang-sala sa kasong kudeta ang kanyang mga kliyente.