Todas ang isang barangay kapitan at anak nitong babae nang pagbabarilin ng mga hinihinalang mi­yembro ng Sparrow unit ng New People’s Army (NPA) sa Ragay, Camarines Sur kamakalawa.

Kinilala ang nasa­wing si Ernesto Baylador y Navera, 59-anyos, Bgy. Kapitan ng Bgy. Upper Binahan, Ragay na sinasabing miyembro ng CAFGU at anak nitong si Janeth Baylador Lasickro, 36, may-asawa sa nabanggit ding lugar.

Ayon sa ulat kahapon sa Camp Crame, kasalukuyan umanong nakikipaghuntahan ang mag-ama sa harapan ng kanilang bahay nang biglang sumulpot ang 2 Sparrow na nakamotorsiklo at walang habas ang mga itong pinaulanan ng bala.

Nadamay naman sa pamamaril ang isang sun­dalong si Corporal Roberto Rigor y Villalluz, nakatalaga sa Army’s 31st Infantry Battalion na kasalukuyang ginagamot sa Bicol Medical Center.

Narekober ng mga awtoridad sa lugar ng pamamaril ang may limang basyo ng caliber .45 pistol. Masusi pa ring iniimbestigahan ng mga tauhan ng Ragay Municipal Police Station ang insidente.