Kahindik-hindik ang huling kabastusan sa bunganga ng isang ranking government official dahil kahit ang size ng pagkalalaki nito ay ginawa niyang tampulan ng biro nang minsang dumalo sa Malacañang.

Takip-tenga na ikinuwento kay Mang Teban ng isang miron ang huling kabalastugan ni government official na kilala sa pagiging taklesa o aral sa paggamit ng mga bastos na pana­nalita kahit na mara­ming nakapaligid na tao.

Ang siste, minsang may pinangunahang sere­monya sa Malacañang ay biglang naihi itong si taklesang government official kung kaya mabilis itong tumalilis patungong comfort room.

Nang makita na sinusundan ito ng mga taga-media ay ipinaalam ni government official na babalik siya at iihi lamang sabay-dagdag na maliit lang naman ang ari niya kaya walang masisilip sa kanya.

“Wala naman kayong makikita eh, maliit lang ‘yung akin,” tila pagyayabang pa ni taklesa na ngi­ngiti-ngiti nang matigilan ang mga sumusunod sa kanya.

Ang nakaka-shock pa rito, karamihan ng mga nakarinig sa bulalas ni taklesang opisyal ay mga kababaihan na nakasunod sa likuran nito.

Ang pagbibiro ni government official gamit ang bastos na lengguwahe ay hindi na bago sa ugali nito dahil minsan na itong naintriga at nasulat sa mga news items nang magbitaw ng masakit na biro sa isang reporter.

Pintahan n’yo na: si taklesang government official ay isa sa mga nangangarap na maging Presidente sa 2010 at ito ay itago na lamang natin sa inisyal na DC.