Sa kabila ng pagseguro ni PNP Chief, Director General Avelino Razon Jr. na walang katotohanan ang pag-ikot ng kulay puting van para dumukot ng mga bata at kunin ang mga laman-loob o internal organs ng mga biktima, ilang insidente ng tangka at bigong pagdukot ang naitala sa himpilan ng pulisya.

Magugunita na ilang araw nang naghahasik ng sindak ang kumakalat na balitang umiikot ang kulay puting L-300 van na may plakang VMM 507 at dumudukot ng mga bata. Gayundin umano ang aktibidades ng van na may plakang VXE 351, mga sasakyang walang rekord sa Land Transportation Office (LTO).

Ang aktibidad ay pina­bulaanan na ni Razon at halos lahat ng police director sa Metro Manila at mga karatig na lalawigan.

Gayunpaman, sa journal ng Regional Investigation and Detective Management Division sa Camp Vicente Lim sa Calamba, Laguna, pinatunayan na may ulat hinggil sa pagdukot ng mga bata, gamit ang puting L-300 van.

Noong March 10, 2008, alas-12 ng tanghali nang puwersahang ipasok sa van ang 12-anyos na si Annabelle Hermosa, residente ng Bgy. San Vicente, San Pedro, Laguna. Ang insidente ay naganap malapit sa Pacita 2 Elementary School. Sa loob ng van na may anim umanong kidnaper, nakita umano ni Hermosa ang isang batang babae at apat na batang lalaki na nag-iiyakan.

Isang lalaki na nakasuot umano ng uniporme ng doktor ang nag-eksamin kay Hermosa, gamit ang stethoscope at nang sabi­hing may sakit ang biktima, pinababa ito sa Guevarra Subdivision, Bgy. San Vicente, San Pedro.

Noong March 3, 2008, tinangka rin umano ng anim na kalalakihan na kidnapin si John Michael y Yumpacan, 11-anyos, sa bisinidad ng Ibayo Ele­mentary School. Hindi na naipasok sa van na may plakang VMM 507 ang biktima nang magpupu­miglas ito at makatakbo. Ang dalawang insidente ay nai-report na sa regional director ng PRO-CALABARZON.

Sa Batangas, may police report din ang pagkawala nina Patricia Pateña, 5 at Fatima Buceta, 4. Ang dalawa ay nawala noong katanghalian ng February 19, 2008 sa Poblacion, Ibaan, Batangas.

Pagkatapos ng mga kahalintulad na report ay umikot na ang text messages na naglalaman ng mga babala hinggil sa kidnapping at bigong kidnapping.