Hinamon kahapon ng kanyang mga kasama
sa Kamara si Pangasinan Rep. Jose de Venecia Jr. na ibunyag ang
lahat ng kanyang nalalaman, maging ang aktuwal niyang partisipasyon,
sa sinasabing Spratlys deal ng Pilipinas at China.
“Former Speaker Jose de Venecia should tell everything
that he knows about the origins and background of the Tripartite
Agreement for Joint Marine Seismic Undertaking in the Agreement
Area in the South China Sea signed March 14, 2005, especially his
role in the initiation, negotiation and signing of the agreement,”
hamon ni House deputy minority leader Roilo Golez.
Binigyan-diin ni Golez na tanging si De Venecia lamang ang makapagsasabi
kung may katotohanan ang alegasyon na ang paghahabol ng Pilipinas
sa Spratly Islands ang naging kapalit ng multi-bilyong dolyar na
pautang ng China para pondohan ang sinasabing mga overpriced at
kickback-ridden na mga proyektong tulad ng NBN-ZTE, CyberEd, Northrail
at Southrail.
Batay sa naglabasang ulat, si De Venecia ang itinuturong ‘ahente’
ng multi-billion dollar deal na ito na ang isinangkalan diumano
ng pamahalaang Arroyo ay ang Spratlys claim ng Pilipinas. Minsan
nang pinabulaanan ni De Venecia ang ulat ngunit marami ang umaasang
sa pagkakataong ito ay ‘kakanta’ na ang dating kaalyado
ng administrasyon matapos itong pitikin sa liderato ng Kamara.
Bilang panghihimok naman sa dating speaker, sinabi ni Golez na walang
sinumang maniniwala na solong naisara ni De Venecia ang deal sa
China kung totoo man ito. Tiyak umanong may basbas ni Pangulong
Gloria Macapagal-Arroyo ang kasunduan dahil ito lamang ang awtoridad
na puwedeng kilalanin ng China sa ganito ka-sensitibong transaksyon.
Gayunpaman, itutulak pa rin ni Golez na si De Venecia mismo ang
maglatag ng katotohanan sa likod ng ugong na ‘Spratlys deal’.
Partikular sa hihimaying impormasyon sa pinatalsik na speaker ay
kung mayroong matataas na opisyal ng gobyerno ang kasangkot sa multi-bilyong
loan package na ito.
Kamakalawa ay isinulong ng 14 na kongresista ang imbestigasyon sa
sumisingaw na Spratlys deal kung saan mismong ang kaalyado ng Pangulo
na si Camarines Sur Rep. Luis Villafuerte, presidente ng Kampi party
ni Arroyo, ang isa sa mga naghain ng resolusyon. Bagama’t
malinaw na ang target ng hakbang ng administration bloc ay mapitpit
si De Venecia, pinaniniwalaang mahahagip din dito ang Pangulo na
kung mapapatunayan ay maaaring maharap sa impeachable offense na
‘treason’ o pagtataksil sa bansa.
Sa Senado, may isinampa na ring resolusyon si Sen. Antonio Trillanes
IV at sinundan pa nina Sens. Panfilo Lacson at Jamby Madrigal na
naglalayong paimbestigahan ang ‘Spratlys deal’.
Ang China at Pilipinas ay ilan lamang sa mga bansa sa Asya na nagki-claim
ng pagmamay-ari sa oil-rich na isla ng Spratly at sinasabing para
makakuha ng multi-bilyong dolyar na loan package ay ipinagkasundo
diumano ng pamahalaang Arroyo sa China ang claim ng Pilipinas sa
naturang group of islands.
Kamakalawa ay umani ng suporta mula mismo kay Senate President Manny
Villar ang naturang mga hakbang at kahapon ay dumagdag sa suportang
ito si Senate majority leader Francis ‘Kiko’ Pangilinan.
Sinabi ni Pangilinan na kung may katotohanan ang naturang ulat ay
dapat na maalarma ang buong sambayanan dahil ipinapakita lamang
nito na hindi na mapagkakatiwalaan ang sariling gobyerno para protektahan
at isulong ang pangkalahatang interes, pati na ang kasarinlan. “Dapat
nating malaman kung binebenta na ba tayo ng sarili nating gobyerno,”
diin ng senador.
|
