Nakalatag na ang isang ‘bagong gobyerno’
oras na mahimok si Pangulong Gloria Macapagal-Arroyo na bumaba na
sa puwesto.
Ito ang ibinunyag kahapon ni dating Education Sec. Florencio ‘Butch’
Abad, miyembro ng ‘Hyatt 10’ (mga cabinet members ni
Arroyo na nagbitiw noong 2005 sa kasagsagan ng ‘Hello Garci’
scandal), na nagsabing ipinoporma na ang “Constituency for
Reform”.
Binubuo umano ito ng mga dating miyembro ng gabinete na nakahandang
magsama-samang muli upang tumulong sa pagtayo ng isang ‘bagong
gobyerno’ pagbaba ni Arroyo.
“Hindi na tayo dapat magkamali pa sa pangatlong beses...Everybody
is conscious that if something happens, you cannot leave politicians
to take care of the transition,” ani Abad na ang pinapatungkulan
ay ang nagawang pagkakamali ng taumbayan sa EDSA 1 at 2 na kung
saan liderato lamang ang napalitan ngunit ang bulok na sistema ng
gobyerno na nagpapahirap sa taumbayan ay naroon pa rin.
Ayon pa sa kanya, kasama sa paghahanda ng grupo ang “clustering”
para tutukan ang iba’t ibang aspeto ng bagong gobyerno. Ang
mga clusters na ito ay kinabibilangan ng economics and finance,
politics and accountability at social services.
Gumagalaw na rin umano ang grupo upang iorganisa ang iba’t
ibang eksperto sa lipunan para tutukan ang pagrereporma sa mga institusyon
ng gobyerno gaya ng Commission on Elections (Comelec).
“We’re consolidating forces,” diin ni Abad bilang
paghahanda sa pagbakante sa puwesto ng Pangulo ng bansa sa pamamagitan
ng isang constitutional process.
Ayon naman kay dating peace process secretary Teresita Deles na
miyembro ng ‘Hyatt 10’, ang mga binabalangkas ng “Constituency
for Reform” ay hindi lamang pagbabago ng tao sa loob ng gobyerno
kundi pagbabago sa dapat kalakaran ng pagpapatakbo ng gobyerno pagkatapos
ng kasalukuyang administrasyong Arroyo.
“People want to make sure that this time it’s not just
the change of people. There should be actions that need to be pursued
after this administration,” ani Deles.
Ultimatum na!
Bago ibinunyag ni Abad ang pagbuo ng “Constituency for Reform”,
sumulat ang grupo sa tanggapan ni Arroyo at ipinabatid dito ang
kanilang pagsuporta sa kahilingan ng Catholic Bishops Conference
of the Philippines (CBCP)
Una ang pagbasura sa Executive Order 464 at hayaang dumalo na si
dating National Economic Development Authority (NEDA) Sec. Romulo
Neri na tumestigo sa Senado.
“If there will be no meaningful and satisfactory response
from her...the call for resignation is most likely our next step,”
ani Abad.
Extra-constitutional na pagpapatalsik ibinabala
Sa panig naman ni Bayan Muna Rep. Satur Ocampo, hindi malayong mag-iba
ang ihip ng hangin kung magmamatigas si Arroyo at isantabi ang constitutional
process.
“Bukas na ang usapin[g] ito [sa] ngayon,” ani Ocampo,
na ang pinapatungkulan ay ang extra-constitutional na pagpapatalsik
kay Arroyo sa puwesto.
Sisters: Illegitimate, immoral si GMA
Samantala, isang grupo ng mga madre sa Mindanao ang pumalag na rin
sa tinawag nilang “immoral” at “illegitimate”
presidency ni Arroyo.
“We stand by our belief that President Arroyo has committed
the grave sin of stealing her legitimacy from the people. She has
committed a serious immoral act in governance,” ani Sr. Elsa
Compuesto, executive secretary ng Sisters’ Association in
Mindanao (SAM).
Lady solons: Resign, Gloria!
Para naman sa mga lady legislators sa pangunguna nina Congw. Cynthia
Villar at Gabriela partylist Rep. Liza Maza, isang malaking kabiguan
at kahihiyan para sa kababaihan si Arroyo.
“Gloria Macapagal Arroyo is a huge failure. She has, in several
ways, failed the lot of Filipino women in her seven years of governance,”
ayon kay Maza kaugnay ng pagdiriwang ng Women’s Month ngayong
Marso.
Naniniwala naman si Villar na siyang pangulo ng lady legislators’
group, na malaki ang pananagutan ng Pangulo sa matinding katiwalian
sa pamahalaan.
“Ako ok rin, if that would solve the problem,” ayon
pa kay Villar nang tanungin kung pabor siya sa panawagang pagbibitiw
ni Arroyo.
Cory, pinapatigil na ng M’cañang
Pinapatigil na ng Malacañang si dating Pangulong Corazon
Aquino sa walang tigil na pag-iikot at pananawagan sa pagbaba ni
Arroyo.
Sa halip ay hinamon ni deputy presidential spokesman Lorelei Fajardo
na dapat umanong maging ‘agent of development’ ang dating
pangulo imbes na maging ‘agent of discord’ o pagkakahati-hati
ng bansa.
|
