BALAYAN, Batangas --- Sa kulungan bumagsak ang magkumareng tulak ng bawal na gamot makaraang makuha mula sa kanilang pag-iingat ang mga supot ng shabu na kanilang ibinebenta kamakalawa.

Kinilala ni Chief Insp. Roberto A. Baleros, hepe ng pulisya, ang mga inaresto na sina Vilmar Sale y Custodio alyas ‘Bubot’, 37, dalaga, nakatira sa Jamaica Subdivision, Barangay Caloocan at Mylene Macalalad y Bunguin, 30, may-asawa, taga-Villa Esperanza ng barangay ding nabanggit.

Sa report ng lokal na himpilan kay Sr. Supt. David Micu Quimio, provincial director, sa bisa ng search warrant # 2008-18 at 2008-19 mula sa sala ni MTC Judge Cristino Judit ay magkasunod na ni-raid ng grupo ni Baleros ang bahay ng mga suspek dakong alas-tres at alas-kuwatro ng hapon kaugnay ng tinanggap na impormasyon na ang mga ito ay nagbebenta ng droga.

Narekober mula sa bahay ng dalawa ang 10 sachet ng shabu pati na ang mga gamit nila sa pagre-repack at hindi pa batid na halaga ng salapi na pinaniniwalaang “drug money”.