Nagkasya na lamang si Pangulong Gloria Macapagal-Arroyo sa isang phone conversation kay US presidential candidate Sen. Barack Obama dahil inisnab ng huli ang dapat ay one-on-one meeting nila ng Philippine leader dahil sa busy nitong iskedyul.

Ngunit ang duda nina Senate minority leader Aqui­lino Pimentel Jr. at Sen. Panfilo Lacson, posible umanong sinadya talaga ni Obama na isnabin ang Pa­ngulo sa takot na mabiktima ng ‘kiss of death’.

Ang ‘kiss of death’ ay tawag ng oposisyon sa endorsement o basbas ni Arroyo sa sinumang kandidato dahil tiyak umano ang pagkatalo nito.

“Alam ni Obama na maraming mga Pinoy supporter niya na ayaw na didikit si Gloria sa kanya,” ani Pimentel.

Mula sa New York City, sinabi ni Press Sec. Jesus Dureza sa panayam sa telepono na tinawagan ni Obama ang Pangulo dakong alas-tres ng hapon (New York time) upang humingi ng paumanhin sa naunsyaming paghaharap.

Sa saglit na phone conversation ay kinilala ni Obama ang Pilipinas bilang solidong kaalyado ng Estados Unidos partikular sa paglaban sa terorismo at pagpapatibay ng demokrasya.

Bago bumalik ng bansa ay makikipagkita si Arroyo sa karibal ni Obama na si US Sen. John McCain ng Republican party sa Wa­shington DC.