Nahaharap ngayon sa kasong “business malpractice” ang Sun Life of Canada Philippines Inc. dahil sa umano’y ilegal na pagpapalabas ng impormasyong pinansiyal ng isang policy holder na may $1.8 mil­yong investment sa iba’t iba nitong insurance policy.

Ang nasabing kumpanya ay sinampahan ng kaso sa Manila City Regional Trial Court, Branch 6, ni businesswoman Ma. Teresa D. Chua, kung saan ikinatwiran na ang nasabing leak ay nagbunsod sa kaniya ng “mental anguish, severe anxiety, sleepless night, wounded feelings ... ridicule, embarrassment and humiliation.”

Sa 2-pahinang order, itinakda ni Presiding Judge Jansen R. Rodriquez of Manila City Regional Trial Court, Branch 6, ang pre-trial ng reklamo ni Chua laban sa Sun Life, pinakamatagal na domestic life insurance arm ng Toronto-based Sun Life Financial Group of Companies, sa August 28, 2009.

Si Chua ay humihi­ling ng P25 million damages sa Sun Life dahil sa umano’y paglabag nito sa Code of Business Conduct nang magpalabas ng mga personal na impormasyon hinggil sa kliyente nito.

Sa insidente, sinabi ni Chua na hindi lang kanyang emosyon ang nasaktan kundi ang kanyang negosyo na nalugi rin ng hanggang P5,481,250.

Sa 6-pahinang reklamo nito, sinabi ni Chua na ang Sun Life ay nagbigay ng kanyang mga perso­nal na impormasyon sa Bureau of Internal Revenue (BIR), umano’y paglabag sa confidentiality agreement ng kumpanya, gayundin sa Code of Business Conduct.