• MAYOR SWAK SA CES KIDNAP!
• Krisis sa bigas lalala sa subsidy
• Rights body tututok sa demolisyon
• Pinoy combo Doble-kayod

Tuluyan nang itinuring ng pulisya bilang mga suspek si Indanan, Sulu Mayor Alvarez Isnaji at anak nitong si Haider ‘Jun’ Isnaji, kapwa tumayong negosyador sa kidnapping ng ABS-CBN news team ni Ces Oreña-Drilon.

Dahil dito, hindi na pinawalan at agad na inilagay sa kustodya ng Criminal Investigation and Detection Group (CIDG) ang mag-amang Isnaji na nakatakdang sampahan ng four counts ng kasong kidnapping sa Department of Justice (DOJ).

Ayon kay Philippine National Police (PNP) chief Director General Avelino Razon Jr., lumakas ang kanilang ebidensya laban sa mga nabanggit base sa mga nakalap na mga salaysay at rebelasyon ng mga testigo sa paggulong ng imbestigasyon kasunod ng pagpapalaya kina Drilon at mga cameramen na sina Angelo Valderama at Jimmy Encarnacion at guide na si Mindanao State University (MSU) Prof. Octavio Dinampo.

“Pagka-release nina Drilon, when the investigation started (and) after debriefing of the victims dito na-unravel (‘yung) fact na Isnaji is involved in the kidnapping,” paliwanag ni Razon.

Maliban dito, marami rin aniyang nakitang inconsistencies sa mga pahayag patungkol sa kidnapping nina Drilon ang mag-amang Isnaji na sumasailalim sa maghapong interogasyon ng anim na abogado ng CIDG sa Camp Crame.

Malaking palaisipan pa rin sa mga awtoridad kung bakit partikular na napisil ng grupo ng Abu Sayyaf sa likod ng Drilon kidnapping si Isnaji para tumayong negosyador.

Kabilang sa nakatakdang sampahan ng kaso ay ang may 14 miyembro ng ASG na tinukoy ng apat na bihag, isang Atty. Inawat at isang nangangalang Kasim. Kinilala ni Gen. Razon sa hiwalay na ulat ang suspek na si ‘Kasim’ bilang si Sulu Police provincial commander Sr. Supt. Julasirim Kasim.

“We have questioned Col. Kasim and we are looking for Atty. Inawat, ‘yung kausap niya doon,” ani Razon.

Niliwanag naman ng heneral na hindi ibinibilang na suspek si Dinampo na kasalukuyan pa ring sumasailalim sa debriefing sa CIDG sa Zamboanga City. Maaari rin aniya itong ipatawag anumang oras ng mga police probers kung kakailanganin.

Kahapon ay inilabas ng militar sa media ang propesor at dito ay siniguro nitong, “I am not being held against my will.”

Wala nang magne-negotiate

Nagpahayag naman ng pangamba si Sulu Rep. Yusof Jakiri na mag-iwan ng negatibong marka ang pagkakaipit ngayon ng mag-amang Isnaji matapos na tumulong sa negosasyon na humantong sa ligtas na pagpapalaya sa buong ABS-CBN news team.

Marami na umano ang matatakot na mamagitan sa mga susunod na insidente ng hostage-taking at kidnapping sa takot na masabit sila at mapagdudahang kasabwat ng mga abductors.

Mismong ang pinala­yang propesor ng MSU ay hindi makapaniwala sa paratang sa alkalde habang maluha-luha nitong isinasalaysay sa media ang pagsisikap na ginawa ni Isnaji para sila mapalaya. “Mayor Isnaji is instrumental in our safe release,” wika nito. “There is no basis for the authorities to hold Mayor Isnaji. Isnaji was someone the negotiators trust since (Sulu Deputy Gov. Nur Ana) Sahidulla was rejected by the Abu Sayyaf.”

Maging ang pamunuan ng Moro National Libe­ration Front (MNLF) ay nagbigay ng buong suporta sa mag-amang Isnaji. Hindi umano nila mapaniwalaan ang ibinibintang dito ng mga awtoridad matapos ang matagumpay na mis­yon ng alkalde.

“We were all shocked by the news. This is very unfortunate because Mayor Isnaji is a good man. We don’t believe he is involved in anyway with the kidnappings and he should be set free by the authorities,” ani MNLF chief at Cotabato City Mayor Muslimin Sema sa panayam ng Abante.

Sino si Mayor Isnaji?

Si Isnaji ay isa sa pitong kandidato na tatakbo sa pagka-gobernador sa Muslim autonomous region sa August. Kalaban din ni Isnaji sa posisyon ang kasalukuyang gobernador ng Muslim autonomous region na si Zaldy Ampatuan, na kaalyado naman ni Pangulong Gloria Macapagal-Arroyo.

Kasalukuyan itong chairman ng Sulu League of Municipalities. Bago ito naging mayor ay naging speaker ito ng Regional Legislative Assembly sa Muslim autonomous region at minsang naging acting regional governor noong 2001.

Miyembro rin si Isnaji ng MNLF’s Central Committee na siyang lumagda ng peace agreement sa pamahalaang noong 1996.

M’cañang ‘di kakanlu­ngin ang aklakde

Hindi pagkakalooban ng proteksyon ng Malacañang ang Indanan mayor at anak nito mula sa kakaharaping kaso.

Sa halip, sinabi ni Press Sec. Jesus Dureza na dapat na manaig ang hustisya at ipatupad ang “full force of the law” at walang exempted dito.

“Government’s trajectory now is to get all those involved and apply the full force of the law. If there is sufficient evidence adduced against anyone, Mayor Isnaji included, then the axe of justice will necessary take its swing,” ani Dureza.

Gayunpaman, sinabi rin ng Palasyo na kung wala namang sapat na ebidensya laban sa alkalde at anak nito ay marapat lamang na linisin ang pangalan ng mga ito.

Siniguro rin ni Local Government Sec. Ronaldo Puno na pananagutin sa batas ang lahat ng sangkot sa kidnapping, anuman ang naging partisipasyon nito.

Sa kaso umano ni Isnaji at ng anak nito, partikular sa inihahanap ng sagot ay kung sino ang higit na nakinabang sa serbisyo ng tumayong negosyador: ang mga bihag ba at pamilya nito o ang bandidong kidnappers? Sa puntong ito lamang umano maeestablisa kung may kinalaman o kung may naging bahagi nga ang alkalde sa krimen higit sa kalutasan nito.

Misteryo ng duffel bag

Sa kabila ng paulit-ulit na paniniyak ng pamahalaan (lokal at nasyunal), ng pamunuan ng ABS-CBN at ng pamilya ng mga biktima na walang naganap na bayaran ng ransom kapalit ng paglaya ng apat, pinalalim ng pulisya ang imbestigasyon sa ‘misteryo ng dalawang duffel bag’ na diumano’y pinaglagyan ng multi-milyong ransom na ipinantubos sa grupo ni Drilon.

Dito nadawit ang pa­ngalan ni Kasim matapos mapaulat na naispatan diumano ang koronel sa Jolo Airport noong Martes ng hapon sa paglapag ng isang commercial flight ng Seair na diumano’y naghatid ng dalawang bag ng pera.

Nauna nang binatikos ni Sen. Rodolfo Biazon ang patuloy na pagtanggi ng pamahalaan sa ransom dahil napakaimposible umano nitong paniwalaan.

Kahapon ay nakiisa rin si Fr. Ronhillo Aquino, Dean ng Graduate School of Law ng San Beda College, sa pagbatikos sa ‘script’ ng gobyerno sa pagsasabing napakala­king kaistupiduhan ito para bumenta sa tao.

Kahapon ay inilutang din ni Justice Sec. Raul Gonzalez ang dudang ‘fund raising’ para sa kandidatura ng ilang pulitiko ang nasa likod ng naturang kidnapping. Ang tinutukoy ay ang nalalapit na Autonomous Region in Muslim Min­danao (ARMM) elections sa Agosto 11 ng taong ito.

Mga batang bandido, mararatrat din

Aminado ang pamunuan ng militar na wala itong magagawa sakali umanong mga batang miyembro ng bandidong Abu Sayyaf ang makasagupa nito sa inilunsad na punitive action sa kuta ng mga ito sa Basilan at Sulu.

Ito ang inihayag na reaksyon ni Armed Forces of the Philippines Public Information Office Chief, Lt. Col. Ernesto Torres Jr., sa ginawang rebelasyon ng napalayang Channel 2 anchorwoman na kabilang sa mga dumukot sa kanila ay mga menor-de-edad (12 hanggang 17-anyos) na armado ng matataas na kalibre ng armas.

Ipinaliwanag pa ni Torres na may mga insidente na umanong may napatay ang militar na mga child combatants dahil hindi naman umano kaagad malalaman ng mga sundalo na mga menor-de-edad pala ang kanilang nakakasagupa.

Sa panig naman ni Sec. Gonzalez, sinabi nitong hindi maaaring kasuhan ang mga batang kidnappers na inilarawan ni Drilon na siyang nagbantay sa kanila dahil ipinagbabawal umano ito ng batas.

Sa halip ay ibibigay umano ang mga ito sa kalinga ng Department of Social Welfare and Development (DSWD) kung mahuhuli.

“...they have grown up on culture where violence is accepted,” pagbibigay-katwiran ng kalihim sa aksyon ng mga batang bandido.