Malinaw ang ipinahihiwatig ng malawakang rally kahapon sa halos buong sulok ng bansa na ayaw na ng taumbayan ang ginagawa ng kasalukuyang administrasyon ni Pangulong Gloria Macapagal-Arroyo.

Parang isang kumukulong tubig na sa isang iglap ay tuluyan nang sasabog kapag hindi nag-ayos-ayos ang mga nakaupo sa pamahalaan.

Bagama’t hindi naabot ng rally ang target na bilang, ang mahalaga ay nakapag­labas ng saloobin ang taumbayan hinggil sa isinusulong na Constituent Assembly ng mga kapanalig ng Pangulo.

Malinaw na ayaw nila ng Con-Ass, ayaw nila ng Charter change at higit sa lahat ayaw nila ng term extension.

Pagbali-baligtarin man ang mundo, pagpapalawig sa termino ni Arroyo ang tinutumbok ng Con-Ass na ito at ngayon na nagsalita na ang taumbayan, siguro naman dapat nang patigilin ni Arroyo ang kanyang mga alagad sa kanilang masamang binabalak.

Maraming bagay ang dapat na unahin ng gobyerno, nariyan ang malaking banta ng A-H1N1 na malapit nang ideklarang pandemic, at dengue na patuloy pa ring bumibiktima sa maraming Pilipino.

Kung tutuusin, mas dapat na bigyan ng solusyon ang patuloy na pananalasa ng dengue sa bansa lalo na ngayong tag-ulan na at hitik na naman ng mga lamok ang kapaligiran.

Marami nang buhay ang nawala sa sakit na dengue at ngayon tila kulang pa rin ang ginagawang hakbang ng health department para tuluyang masugpo ito.

Nariyan din ang problema sa patuloy na pagbulusok ng export industry na tiyak na magpapapalala ng problema sa unemployment sa bansa.

Maraming mas importanteng isyu ang dapat na unahin ng gobyernong ito, kalimutan na ang term extension.