Naunsyami at lumung-lumo ang apat-kataong nagsisipag-jamming nang bigla na lamang bumungad ang mga operatibang nagsipang-aresto sa kanila makaraang magsuplong ang isang impormante hinggil sa aktibidades ng mga ito sa Binangonan, Rizal.

Sa ulat na isinumite ni Binangonan Police chief, Supt. Rodino Elfa, ang mga naaresto ay sina Bernie Cruz, 41, binata; Manuel Cruz, 39, may-asawa;
Bryan Adam Vidal, 21, binata; at si Federico Torres, 38, pa­wang mga residente ng San Valentin, Bgy. Pantok, Bina­ngonan.

Base sa naging pagsisiyasat ni PO1 Remson Colacion, ang mga suspek ay naaresto dakong alas-10:35 kamakalawa ng gabi ng mga elemento ng Intelligence at Municipal Anti-Illegal Drugs Special Operation Task force na aktong nagpa-pot session.

Isang impormante umano ang nagsuplong sa mga ope­ratiba kung saan agaran namang tinungo ang kinalulu­garan ng mga suspek at nanlaki na lamang ang kanilang mga mata nang mabungaran ang mga operatiba na agad ay sinamsam ang kanilang mga paraphernalia sa pagsasagawa ng pot session.