Hindi diplomatic passport ang ginamit ng detinadong si Ilocos Sur Rep. Ronald Singson sa pagpasok nito sa Hong Kong kung saan ito nahulihan ng ilegal na droga sa aiport nitong Hulyo 11.

Ito ang natuklasan ng Department of Foreign Affairs (DFA) na isang regular na pasaporte at hindi official o diplomatic passport ang gamit ni Singson taliwas sa naunang mga ulat ng Bureau of Immigration na diplomatic passport ang gamit ng kongresista nang mahuli.

Sa ipinaabot na mensahe ng Hong Kong police sa DFA, si Singson ay pumasok ng Hong Kong gamit ang isang regular na pasaporte kaya’t walang maibibigay ditong diplomatic immunity.

“Na-establish namin na si Singson, noong pumasok sa Hong Kong, ay gumagamit ng regular passport katulad ng passport na ginagamit ng karamihan sa ating kababayan. Hindi red o official passport, hindi blue o diplomatic passport,” paglilinaw ni DFA spokesperson Eduardo Malaya.

Matatandaang inaresto si Singson dahil sa pagtataglay ng 26.1 gramo ng cocaine at dalawang tableta ng valium.