Naghain ng “not guil­ty plea” sa karagdagang kasong murder ang panguna­hing akusado sa Maguindanao massacre na si dating Datu Unsay Ma­yor Andal Ampatuan Jr. at 16 na iba pa kaugnay sa ika-57 biktima sa karumal-dumal na krimeng naganap noong Nobyembre 23, 2009.

Dakong alas-8:30 ng umaga nang basahan ng demanda sa sala ni Quezon City Regional Trial Court (QCRTC) Judge Jocelyn Solis-Reyes ng Branch 221 na ginanap sa Camp Bagong Diwa Taguig City sina Andal Jr. kasama sina Insp. Sukarno Dicay, PO3 Rasid Anton, Takpan Dilon, Esmael Canapia, PO2 Hernanie Decipulo Jr., PO2 Saudiar Ulah, PO2 Saudi Pasutan, PO1s Herich Amaba, Esprielito Lejarso, Rainer Ebus, Inspectors Rex Ariel Diongon, Michael Joy Macaraeg, PO1 Pia Kamidon, Muhamad Sangki, Maot Dumla at Thong Guimano na pawang naghain din ng not guilty plea.

Ang pagbasa ng demanda sa mga akusado ay para sa karagdagang kasong isinampa ni Catherine Nuñez, maybahay ng anchor ng UNTV na si Victor Nuñez na pinakahuling nakilala at siyang naging ika-57 biktima ng massacre.

Hindi naman natuloy ang pagbasa ng demanda sa dalawang opisyal ng PNP na sina Supt. Abdulwahid Pedtucasan at Chief Insp. Abdulgapor Abad at da­lawa pa nilang tauhan na sina PO1 Michael Macarongon at PO1 Mohammad Balading bunga ng inihaing mosyon na humihiling na mabinbin muna ang arraignment.