Nilinaw kahapon ng mga mambabatas na nagsusulong
ng Reproductive Health Bill na hindi pro-abortion o nag-eendorso
ng aborsyon ang naturang panukala.
Sinabi pa ni Iloilo Rep. Janette Garin na propaganda lamang umano
ng Simbahang Katoliko ang naturang insinuwasyon upang mabigyan ng
katwiran ang labis nilang pagtutol dito.
“Kahit ako, I’m not supporting any move to legalize
abortion. I am against abortion,” pahayag ni Garin bagkus
ang layunin lamang ng kanilang panukala ay bigyan ng tamang edukasyon
ang mga mahihirap kung papaano magplano ng pamilya.
Ramdam aniya ng mga lider ng Simbahang Katoliko na suportado ng
taumbayan, lalo na ang mga mahihirap, ang kanilang panukala dahil
alam na ng mga ito ang epekto ng napakaraming anak.
“Majority of our people, gustong magplano ng pamilya. Pero
ang problema they don’t know how to do it, where to start
at walang suporta silang nakukuha sa gobyerno, that’s why
we come out of this bill,” ani Garin.
“We want to educate our people on family planning. There was
no provision on our consolidated bill that we allow abortion,”
dagdag pa ng lady solon.
Aminado si Garin na isinusulong nila ang paggamit ng contraceptives
tulad ng condom at pills para makontrol ang pagbubuntis ng mga babae
subalit hindi ito nangangahulugan na pro-abortion umano ito.
“This is completely untrue (legalisasyon ng abortion). On
the contrary, a rational and comprehensive national policy on family
planning, which includes contraceptive use, reduces significantly
the rate of abortion as documented by international studies. Consequently,
there is no need to legalize abortion if there is an increased usage
of modern and effective contraceptives,” paliwanag naman ni
Albay Rep. Edcel Lagman, pangunahing awtor ng nasabing panukala.
Matagal na anilang napatunayan na hindi epektibo ang natural method
na siyang isinusulong ng Simbahang Katoliko kaya panahon na umano
para sa makabagong pamamaraan ng pagpaplano ng pamilya.
“’Yung natural method okey din ‘yun but its not
guarantee na hindi mabubuntis ang babae. Most of the time, natatamaan
pa rin ang babae dahil nagkamali sila ng bilang kapag gumagamit
sila ng calendar method,” dugtong pa ni Garin na isang practicing
doctor.
Sa katunayan, sa mga Catholic countries tulad ng Guatemala, Chile,
Colombia, Dominican Republic, El Salvador, Honduras, Nicaragua,
Peru, Venezuela, Paraguay, Ireland at Malta ay pinapayagan na ang
kanilang mamamayan na gumamit nito upang makontrol ang kanilang
pag-anak.
Kahirapan kakambal ng paglobo ng populasyon
Nasa pagitan ng 88 hanggang 92 milyon na ang populasyon ng Pilipinas
kaya hindi anila nakapagtataka na lalong lumalala ang kahirapan
sa bansa dahil walang kontrol ang pagdami ng tao.
“In the next 10 to 20 years, more than 100 million na ang
populasyon natin.
Dumarami ang mga tao pero hindi lumalaki ang
lupa na pinagtataniman ng pagkain. It’s not just the corruption
in the government why poverty is getting worst, it’s because
of the huge population we have,” paliwanag ni Garin.
Sinabi naman ni Lagman na marami ng pag-aaral ang lumabas ang populasyon
ang isa sa mga itinuturong dahilan kung bakit lumalala ang kahirapan
sa ibang bansa at kasunod na lamang nito ang corruption.
Aborsyon, resulta ng kamangmangan sa family planning
Ayon pa kay Garin, isa sa mga dahilan kung bakit lumalala ang abortion
sa Pilipinas ay dahil sa kawalan ng edukasyon ng mga Filipino sa
family planning.
Mas nalulubog, aniya, sa kasalanan sa Diyos ang mga kababaihan na
naglalaglag ng sanggol sa kanilang sinapupunan kaysa sa paggamit
ng contraceptive para makaiwas sa pagbubuntis.
“’Yung mga itinatapon na mga baby sa condo building,
‘yung itinapon sa taxi, ‘yung inilaglag sa kanal, mas
kasalanan ‘yun kaysa paggamit ng modern contraceptive,”
ani Garin.
“We really need to educate them. Not encourage them to do
it (sex without marriage) but letting them know the risk to have
an unwanted babies and how it will affect their health and their
future and future of their babies,” dagdag pa ni Garin.
Walang eksaktong datos si Garin kung ilan ang namamatay na nanay
sa pagpapa-abort subalit marami umanong nangyayari sa Pilipinas
na hindi lamang naire-report.
“Death rate because of unwanted pregnancies and giving birth
due to lack of education was getting worst,” ayon pa kay Garin.
“Medical science shows that the side effects of pills are
minimal, if ever. Family planning saves lives. One-third of all
maternal deaths can be prevented by family planning. Unwanted pregnancies
are more life-threatening to mothers and infants,” ayon naman
kay Lagman.
Pressure ng Simbahan
Aminado si Garin na dahil din sa pressure ng Simbahang Katoliko,
paliit ng paliit ang bilang ng mga congressmen na nagsusulong sa
nasabing panukala.
“Dati we are more than 142 but nagde-decrease na. I don’t
know why but maybe because of the pressure from the leader of the
Catholic Church,” pagbubunyag ng lady solon.
Gutom, epekto rin ng lobong populasyon
Kahapon, ibinalandra ni Social Welfare Sec. Esperanza Cabral ang
masamang population management ng bansa, dahilan kung bakit lumalala
ang pagdami ng nagugutom na Filipino sa ngayon.
Dahil wala umanong seryosong pamantayan sa family planning at reproductive
health, dagdag pa rito ang konserbatibong pananaw ng lipunan sa
paggamit ng contraceptives, lalo lamang umanong nababaon sa kahirapan
at kagutuman ang Pilipinas.
Sa panayam ng dzMM, ibinulalas ni Cabral ang totoong saloobin sa
isyu ng birth control at ang kontrobersyal na reproductive health
bill.
Habang todo-deny at iwas-pusoy ang Malacañang sa usapin ng
reproductive health bill, tahasan naman ang paglantad ng suporta
ng DSWD sa naturang panukala.
“Everything is related to population management, the government’s
social welfare efforts cannot sustain a continuously growing Filipino
population. The government’s social services will not reach
them if their numbers continue to grow bigger,” depensa ni
Cabral.
Palasyo naka-distansya pa rin
Bagama’t iginagalang ang posisyon ni Cabral, tiniyak kahapon
ng Malacañang na hindi pa rin nababago ang polisiya ng Arroyo
government na nakakiling sa posisyon ng Simbahang Katoliko sa usapin
ng ‘responsible parenthood’ bilang pinakaepektibong
paraan ng population management.
|
