Dahil sa mataas na presyo ng langis at ng pangunahing bilihin, maraming lifestyle na ng mga Pinoy ang nag-iba sa mga nakalipas na buwan -- ang dating pamamasyal sa mall ay kinalimutan na at maging paghahatid sundo sa mga minamahal ay winaglit na.

Si Teresa Ignacio, residente ng Makati City, call center supervisor at isang single mom, ay dating regular kada Sabado na ipinapasyal ang kanyang dalawang anak sa mall, ito umano ang kanilang bonding dahil kapag weekdays ay abala siya sa trabaho gayundin ay nakatutok ang kanyang mga anak sa eskuwela ngunit ang dating “Saturday Fun” ay kanselado na umano at ang huli nilang pamamasyal ay noon pang Mayo nang bumili sila ng mga gamit sa paaralan.

“Hindi na kaya ng budget, nanghihinayang na ako sa gagastusin kapag pupunta kami sa mall kaya ang sistema ay ipinaliwanag ko sa mga bata na iwas muna sa malls at sa bahay na lamang kami mag-bonding, ang ginagawa ko ay nagluluto na lang ng espesyal na ulam at manonood ng DVD tape,” pahayag ni Igancio.

Aniya, umaangal ang mga anak niya dahil hindi na nakakapasyal sa mall ngunit kailangan umanong maghigpit ng sinturon.

Maging si Amelia Cristobal, 22 anyos, estudyante ng La Salle University sa Taft Avenue, ay malling din ang pagpapalipas oras, aniya, tatlong beses kada linggo silang magkakaibigan na pumasyal sa mall kapag maaga ang uwian sa klase ngunit ngayon umano ay hindi na nila ito magawa.

“After ng klase ay diretso na kami sa bahay ngayon, uwian na agad kahit window shopping sa mall ay hindi na kaya kasi ang laki ng gastos sa pagkain pa lang at pamasahe,” paliwanag nito.

Hindi lamang ang pamamasyal ang apektado sa lifestyle ng mga Pinoy nang sumirit sa P55 level ang presyo ng langis at tumaas ang presyo ng mga pangunahing bilihin, maging ang pagiging “sweet” ng mga mag-asawa at mag-boyfriend at girlfriend ay iba na rin.

Si Cristina Sebastian, 33, bank employee sa Makati City ay dating hatid sundo ng asawa sa kanyang opisina ngunit nang magmahal umano ang gasolina ay dalawang beses na lamang kada linggo siya kung ihatid ng mister.

“Two days na lang kasi two days na lang kung dalhin namin ang sasakyan namin, the rest of the days ay sabay na kami mag-commute. Sabay pa rin kami pero nagkikita na lang kami sa pila ng FX at sabay na pauwi ng Las Pinas,” dagdag nito.

Si Aileen dela Cerna, isa ring bank employee, ay hindi na umano sila naghahatiran na mag-asawa, aniya, dagdag pa sa gastos kung magsusunduan kaya ang kanilang sistema ay sa bahay na lamang nagkikita.

“Dati ay dadaanan pa niya ako at sabay na umuwi. Kapag sabay kami ay lagi pa kami napapameryenda bago umuwi na dagdag pa sa gastos. Para makaiwas meryenda pa at matipid na lang ang budget ang strategy namin ay sa bahay na lang kami magkita, sari-sariling biyahe na lang pauwi ng bahay,” ani pa ni Dela Cerna.

Ang mag boyfriend at girlfriend na sina Annabelle at Paul, pawang estudyante ng Emilio Aguinaldo College ang umaming hindi na rin sila madalas mamasyal, anila, kapag uwian ay diretso na sila sa kani-kanilang bahay at wala nang hatiran at madalas ay sa landline telephone na lamang sila nag-uusap.

“Tumaas ang lahat ng bilihin pati pamasahe pero hindi naman ang baon namin, kaya wala nang extra pa na budget para sa gimik. Mag-boyfriend pa rin naman kami kahit wala nang nood ng sine o pasyal sa mall. Ang importante ay open ang communication naming,” pahayag ni Annabelle.

Kapwa aminado ang mga nakapanayam ng Abante na mas pabor sila kung nagagawa nila ang dati nilang nagagawa ngunit kung kulang sa budget ay hindi na nila ito pagpipilitan dahil mas importante umano na may makain.