Kinuwestiyon kahapon ni administration Sen. Jo­ker Arroyo ang inihaing petisyon ng National Power Corporation (Napocor) sa Energy Regulatory Commission (ERC) para sa karagdagang singil sa kuryente.

Ayon kay Arroyo, ang inihaing petisyon ng Napocor ay taliwas sa katuwiran ng Malacañang na kaya nila gustong palitan ang management kamakailan ng Manila Electric Company (Meralco) ay para mapababa ang singil ng kuryente sa bansa.

Subalit sa naging petis­yon ng Napocor sa ERC para sa karagdagang .36c sa bawat kilowatt hour ng kuryente sa Luzon, lumala­bas na wala palang katotohanan ang posisyon ng Malacañang noon na gusto nilang ibaba ang presyo ng kuryente.

“Para lang tayong nag­lolokohan nito,” wika ni Arroyo sa isang programa ng DWIZ.

Binigyang-diin ni Arroyo na kung talagang gusto ng Pangulo na iba­ba ang presyo ng kur­yente, tulad ng naging pangako ni Government Service Insurance System (GSIS) President at General Manager Winston Garcia nang labanan niya ang pagpapatalsik sa mga Lopez sa Meralco, bakit pa nila hahayaan ang Napocor na magsumite ng rate increase sa ERC.

Idinagdag pa ng senador na rito rin masusubukan kung talagang independent o sunod-sunuran lamang sa Palasyo ang bagong talagang chairperson ng ERC na si dating Pampanga Rep. Zenaida Ducut.