Aksidenteng natalisod nang pinagsanib na puwer­sa ng mga pulis at inspektor ng City Treasurer’s Office ang iligal na slaughter house sa Quezon City kahapon ng umaga.

Sa pangunguna ni QC Treasurer Victor Endriga, nabuking ang lihim na katayan ng hayop sa ilalim mismo ng kilalang Nepa-Q Mart habang isinasagawa ang inspeksyon sa mga hinihinalang madayang timbangan sa lugar.

Noong una, pumalag pa ang guwardiya na buksan ang gate patungo sa matadero subalit agad naman itong sinopla ng mga pulis, dahilan kaya’t tumambad ang sangkaterbang kakatayin sanang mga baboy, baka at kalabaw.

Saksi ang sumulat nito habang tinatanong ang mga matansero, dumating ang tatlong kalalakihan na nagpakilalang kabilang sa may-ari ang matadero at nagsabing alam na umano nina QC Market Adminis­trator Neil Lina at QC Councilor Franz Pumaren ang kanilang operasyon.

Sinasabing walang kaukulang Mayor’s Permit at prangkisa mula sa Quezon City Council, kabilang na ang iba pang clearances mula sa Health Department ang nabanggit na establisyi­mento.