Mistulang nilangaw ang tigil-pasada ng Pinag-isang Samahan ng Tsuper at Operator Nationwide (Piston) makaraang hindi ito maramdaman sa buong Kamaynilaan at ilang bahagi ng bansa.

Sa halip na lumuwag ang kalsada ay nagdulot pa ng sobrang trapik sa Metro Manila kasabay ng pagbuhos ng ulan.

Ayon sa ulat ng Land Transportation Office (LTO) at Land Transportation Franchising and Regulatory Board (LTFRB), wala silang natanggap na ulat sa mga lugar na apektado sa Kamaynilaan kaugnay ng ibinabalang transport strike ng Piston.

Sa ginawang panayam ng Abante sa ilang driver ng pampasaherong jeep, iginiit ng mga ito na bagama’t sang-ayon ang mga ito sa pagkondena sa mataas na singil ng mga Local Government Units (LGUs) sa bawat huli ng mga ito ay hindi naman umano nila maaaring isugal ang kakainin ng kani-kanilang pamilya kung hindi sila bibiyahe.

Partikular sa hindi naapektuhang biyahe ang Caloocan, Malabon, Navotas at Valenzuela (Camanava), Quezon City, Manila, Pasay, at iba pang bahagi ng Metro Manila.

Maging ang Alliance of Concerned Transport Organizations (ACTO) ay umamin na hindi nagtagumpay ang tigil-pasada ng Piston para paralisahin ang biyahe ng mga pampasaherong jeep.

Samantala sa Makati, ilang bahagi lamang nito ang nakadama ng pagkaparalisa sa biyahe matapos na lumahok ang Unified Transport Federation of Makati, ang pinakamalaking transport group ng lungsod.

Hindi naman naging problema ng mga mananakay sa Muntinlupa, Parañaque, Taguig at Las Piñas ang kakulangan ng pampasaherong jeep makaraang maglaan ng libreng sakay ang mga alkalde ng nasabing lungsod.