SAUDI ARABIA --- Isang Pinoy contract worker sa Saudi Arabia ang nagkabali-bali ang buto sa kanyang likod matapos tumalon sa ikatlong palapag ng isang gusali sa hangarin na makatakas mula sa isang Arabo na magtatangkang gahasain ito, ayon sa report na nakarating sa Department of Foreign Affairs (DFA).

Ang OFW ay kinilala ng DFA sa pangalang Edong, nasa ligtas na itong kondis­yon subalit nanatili sa isang pagamutan sa Saudi dahil kailangang lagyan ng braces ang kanyang likod sanhi ng tinamong pinsala sa likod.

Sa inisyal na ulat lumilitaw na nagpatulong ang isang Arab national na hindi natukoy ang pangalan sa biktima upang iakyat sa kanyang condominium unit ang ilang grocery items na binili nito.

Nagmagandang loob naman ang biktima kung kaya’t tinulungan nito ang suspek subalit nang makarating na sa pintuan ng condominium unit ang dalawa ay kinutuban umano si Edong sa masamang binabalak ng Arabo.

Batid umano nito ang ilang insidente na kinasasangkutan ng mga Pinoy na kadalasan ay nabibiktima ng panggagahasa ng mga Arabo subalit takot na lumantad dala na rin ng kahihiyan.