BALANGA CITY, Bataan ---- Muli na namang nakopo ng City Schools Division ng Department of Education (DepEd) ang pagiging topnotcher sa National Achievement Test (NAT) sa elementary level makaraang magtamo ng pinakamataas na puntos ang Balanga City sa katatapos na achievement test noong Marso ng kasalukuyang taon.

Ayon kay Dr. Lilia Santiago, City Schools Division Superintendent, ang Balanga City ang nanguna sa buong bansa sa katatapos na NAT sa grade 6 level na isinagawa noong Marso 6, 2008 matapos itong makakuha ng 84.16% national rating. Pumangalawa rito ang Southern Leyte na may 81.23% habang pangatlo naman ang Ormoc City na may average na 80.91 percent.

Sinabi pa ni Santiago sa Abante na sa nakalipas na apat na magkakasunod na taon ay naging consistent ang City Schools Division bilang top sa rehiyon habang pumangatlo naman ito sa national level noong 2007 base sa ipinalabas na resulta ng National Educational Testing and Research Center (NETRC) kung saan mula sa 77.67% ay umakyat ito sa 84.16%.

Ikinatuwa naman ni City Mayor Jose Enrique Garcia III ang resulta ng nasabing pagsusulit sa pagsasabing patunay lamang ito sa kanyang hangaring makilala ang lungsod bilang “university town” .