Kunwari sa mga press release ng Malacañang ay inaasikaso ni Arroyo ang paghihirap ng mamamayang Pilipino sa gitna ng krisis pang-ekonomiya kung saan libu-libong OFW ang nawawalan ng trabaho.

Pero sa totoo lang patuloy ang pagwaldas ng pera ng taumbayan sa sariling luho kasama na ang kanyang mga alagad.

Sumulat sa aking blog si Ares Gutierrez, isang Pilipinong manunulat na nagtatrabaho sa Gulf News sa Dubai, tungkol sa bisita ni Arroyo. Sabi ni Ares, inis na inis raw siya nang pinakilala ni Arroyo ang sankaterba niyang kasama.

Sabi ni Ares, “Parang naubos ang mga top politicians ng ARMM (Autonomous Region for Muslim Mindanao). Mga sampu o sobra pa na opisyal ang ga- ling ARMM. Nandun ang mga Ampatuans na who were with her purportedly to witness the signing of a proclamation declaring Eid Al Adha as a national holiday.”

“Marami pa,” sabi ni Ares. “There’s Martin Romualdez of Leyte who was seated in front and looked clueless. Ang sarap tanungin kung bakit ‘di nila pinapasuweldo ang mga employees ng Journal. A few days ago one of my former colleagues at the Journal told me that they were only given P1,500 to cover their salary for Mar 1-15!”

Ang iba pang nakita ni Ares doon ay si Congresswoman Girlier Villarosa ng Mindoro na nag-shopping daw pagkatapos dumalo sa pagsasalita ni Gloria Arroyo, sina Congressman Dodo Mandanas ng Batangas, Danilo Suarez ng Quezon. Hindi natandaan ni Ares ang iba.

Mula sa cabinet naman, ang bitbit ni Arroyo ay sina Presidential Peace Adviser Sonny Razon, Energy Secretary Angelo Reyes, Foreign Secretary Alberto Romulo, Trade Secretary Peter Favila, Finance Secretary Gary Teves, Press Secretary Cerge Remonde, Labor Secretary Marianito Roque, at Presidential Assistant Nedy Poblador.

Sabi ni Ares, “I’m supposed to attend her morning press conference but the venue was moved to The Atlantis. ‘Di na ko pupunta. Ang mahal ng pamasahe papunta doon. Just google what Atlantis is and find out for yourself.”

Hinanap ko nga sa Google ang Atlantis at talaga naman, five-star resort hotel. Sabi nga ng isang blogger, P500,000 ang isang kuwarto bawat gabi.

Talaga namang walang krisis para sa mga nakadikit kay Arroyo.

Ang nakapagtataka, bakit balik ng balik si Arroyo sa Dubai. Sabi ni Remonde, kakausapin daw niya ang mga negosyante doon at mga opisyal para mabigyan ng trabaho ang mga Pilipino na marami ngayon ay pinapauwi na dahil mahina ang negosyo sa buong mundo.

Sabi ni Emmanuel Geslani, dating vice chair ng Philippine Association of Service Exporters Inc. (Pasei), natutuyo na rin daw ang job opportunities sa Dubai. Ibig sabihin noon, nagsa­-yang lang ng pera si Arroyo. Nagwaldas siguro ang mas tamang salita doon.

Baka naman may iba silang pakay. Sabi ng kilala kung financial officer, madaling magpasok ng pera doon sa Dubai dahil sanay ang mga Arabo doon sa male-maletang pera. At kapag nasa presidential flight ka, hindi masyadong nag-iinspeksyon ang Immigration at Customs.

Preparasyon yata baka saka-sakaling mapilitan bumaba sa 2010.

* * *

Blog:www.ellentordesillas.com
E-mail:ellentordesillas@gmail.com