|
Maganda itong mga pagsisikap ngayon ng pamahalaan, mula sa mga ahensyang tagapangalaga ng kalikasan hanggang sa mga lokal na pamahalaan, na paigtingin ang kampanya kontra polusyon, plastik at styrofoam.
Sa Metro Manila, kapuri-puri talaga ang paggamit ng kamay na bakal ng mga alkalde sa ilang pangunahing lungsod para tuldukan ang paggamit ng plastik ng mga business establishments gaya ng malls, grocery stores, restaurants at fastfood chains, drugstores at lahat na.
Hinagip na rin ang mga palengke. Unti-unti nang naitutulak ang pagbabalik bayong, basket, supot o sako na ginawang bag sa pamimili.
Pinapayagan lamang ang plastic bag kung ito’y dala ng mismong mamimili at hindi inisyu ng tindahan o stall o kaya para lamang sa mga basang produkto tulad ng mga isda at karne (wet section ng mga merkado).
 Maging ang styrofoam ay tinutuldukan na rin sa ilang lugar sa Metro Manila. Tulad ng plastik ay daang taon din bago ito matunaw at tunay namang nakakasama sa kalikasan at numero uno pang bumabara sa mga daluyan ng tubig na nagreresulta sa mga pagbaha.
Kahapon naman ay ang Laguna Lake Development Authority (LLDA) ang umaksyon at nagpasara ng mga establishments na hindi sumusunod sa tamang pamamaraan ng pagdidispatsa o pagtatapon ng kanilang waste products partikular ang “grease” o mantika na sa halip na magkaroon ng grease trap ay deretso umanong ibinubuga sa Laguna Lake.
Masamang-masama naman talaga ang epekto ng mga plastik, styrofoam at mga waste products ng ilang establishments sa kalikasan. Hindi rin naman bago ang kampanyang ito sa sambayanan.
Napakatagal nang panahong kinakalampag ang kooperasyon ng publiko, lalo na ng mga manufacturers at negosyante, sa kampanya para mapangalagaan ang kalikasan laban sa mga nakakasamang polusyon at kalat.
Nakakatuwa na dumarami na ang mga local officials na puspusang nagpapatupad ng mga pro-environment programs at policies.
Bukod sa pagpapasa ng mga ordinansang magtataguyod ng programa at polisiyang ito, nagposte rin sila ng mahal na multa at mabigat na parusa sa mga lalabag dito at panghuli ay seryosong inilalapat ang parusa at multa.
Basta naman talaga sasamahan ng political will at “lagay free” na kampanya, siguradong magtatagumpay ang kampanyang mangangalaga at sasagip sa kalikasan.
Ang kailangan lang talaga ay seryosohin at isapuso ang kampanya. At ang pinakamahalaga, lahat tayo ang bawat isa sa atin ay makibahagi sa kampanya. Simulan natin sa ating sarili, “SAY NO TO PLASTIC!”
|
