Patay ang riding-in-tandem makaraang maki­pagbarilan umano ang mga ito sa mga humabol sa kanila na pulis sa Barangay San Francisco, Biñan City, Laguna kahapon.

Ayon kay Sr. Supt. Arnel Escobal, director ng PNP-Highway Patrol Group-Laguna, hindi pa nakikilala ang mga suspek dahil walang dalang identification card ang mga ito. Dead-on-the-spot ang dalawa at narekober sa mga ito ang dalawang pistol.

Sinabi ni Escobal na pinara ng kanyang mga tauhan ang dalawa na sakay ng isang motorsiklong walang plaka na nag-menor naman sa harapan ng checkpoint pero pagtapat ay biglang binira ng drayber ang silinyador ng motorsiklo.

Dito na humabol ang mga pulis dahil napansin nilang may nakabukol na bagay sa kanilang bewang. Pagdating sa lugar ay tumigil umano ang dalawa at naglabas ng baril at pinutukan ang mga humahabol na pulis na nagresulta sa ilang minutong palitan ng putok hanggang sa bumulagta ang dalawa.