Walang patawad ang apat na kilabot na holdaper dahil maging ang bitbit na groceries ng dalawang magkaibigan ay kinuha rin ng mga ito kamakalawa ng gabi sa Parañaque City.

Ayon kay PO3 Dennis Matriano ng Parañaque Police Community Precinct-3, alas-8:00 ng gabi nang hol­dapin sina Christian Montesa, 24, at Jonathan Basilio, 18, kapwa ng Purok 2, Lower Bicutan, Taguig.

Naglalakad umano ang dalawa sa Mañalac Avenue nang pagsapit sa kanto ng East Service Road ay hinarang ng apat na lalaki, da­lawa rito ay armado ng kalibre 38 revolver at patalim.

Nagdeklara agad ng hol­dap ang mga suspect at habang nakatutok ang armas ng dalawa sa mga biktima, pinagtig-isahan naman silang kinapkapan ng dalawa pa.

Nakuha na nga umano ng mga suspect ang Asus celphone at P300 ni Montesa at P1, 200 cash n­aman ni Basilio na nasa kani-kani­lang mga bulsa ay kinuha pa rin ng mga salarin ang bitbit na grocery items ng da­lawa.