• SUBUKAN N'YO KAMI!
• Mga kosa inspirado sa 'Papaya'
• MMFF Awards Night pinagkaperahan
• Villar, Senado 'most trusted'--survey
• Mike, Tessie, Tito ipupuwesto
• 6 GSIS off'ls kinasuhan

Masusubukan ni Pangulong Gloria Macapagal-Arroyo ang pasensya ng taumbayan oras na ipilit ng mga kaal­yado nito ang pagsusulong ng Charter change (ChaCha) na mangangahulugan ng pananatili nila sa puwesto ‘beyond 2010’ sa pamamagitan ng paglusaw sa eleksyon.

Ito ang binitiwang babala kahapon ng minority bloc ng Kamara sa pa­ngunguna ni Bayan Muna partylist Rep. Satur Ocampo na nagsabing hindi na umano mapapalampas ng sambayanan ang ganitong ‘kakapalan’ kung sakali.

“The Filipino people are fully aware that Mrs. Arroyo has no other legal option to stay in po­wer beyond 2010. Resurrecting ChaCha only highlights Mrs. Arroyo’s ser­ving agenda. Subukan lang nila. Sobrang kapal na ta­laga,” diin pa ni Ocampo.

Kung nakaligtas umano ang Pangulo sa pagtatangka ng Magdalo soldiers sa pangunguna ni Sen. Antonio Trillanes na mapaalis siya sa puwesto, hindi na siya makakaiwas sa ngitngit ng taumba­yan kapag ipinilit nito ang kanyang term extension sa pamamagitan ng ChaCha.

Batid na umano ng taumbayan na kaya muling binubuhay ng administrasyong Arroyo ang ChaCha ay dahil nakaplano na ang patuloy na pagkapit ng Pangulo sa poder kahit tapos na ang termino niya sa 2010.

Iginiit din ni Cagayan de Oro Rep. Rufus Rodriquez na hindi napapanahon ang pagtalakay sa ChaCha dahil ito’y tiyak na muling magbibigay na ng tensyon at maghahati sa taumbayan.

Mas marapat umanong tapusin na muna ang termino ng mga nakaupo ngayon at saka na lamang muling pag-usapan ang ChaCha sa termino ng mga bagong halal na opis­yal upang maiwasan ang pagdududa sa kasaluku­yang administrasyon.

Kasabay nito, todo tanggi naman si House Speaker Jose de Venecia Jr. na siya ang nasa likod ng muling pagtutulak at pagbubuhay sa ChaCha.

Sa isang interview sa radyo, sinabi ni De Venecia na tulad ng nauna niyang pangako ay isinantabi na muna ang ChaCha at sa halip ay pinagtutuunan ng pansin ng Kamara ang mga mahalagang panukalang nakabinbin.

“I have said repeatedly that we should not discuss Charter change so I have stuck with my commitment,” ayon kay De Venecia sabay nguso sa ilang galamay ng Malacañang na maaari umanong nasa likod ng muling paggalaw ng ChaCha.

Kaugnay nito, muli namang binarahan ng Senado ang ideya ng ChaCha.

“I don’t think ChaCha has a chance whatsoever,” paniniyak ni Sen. Francis ‘Chiz’ Escudero na itinuturing na ‘dark horse’ sa 2010 elections.

Maging si Sen. Mar Roxas, isa sa lumulutang na pangalan sa hanay ng mga presidentiable sa 2010, ay hindi pabor sa ChaCha sa pagsasabing hindi ito ang sagot sa napakaraming problema ng bansa.

Sa panig naman ni Senate majority leader Francis ‘Kiko’ Pangilinan, nahihilera sa vice presidential bets, sinabi nitong hindi lamang ang mga senador ang maigting na tumututol sa ChaCha kung nga­yon ito isusulong kundi ang taumbayan mismo.

“Hindi papayag ang taumbayan na manatili pa lampas ng 2010 si GMA,” anang senador.

Maging si Sen. Richard Gordon na isa sa supporters ng ChaCha ay nagsabing hindi makakalusot sa kanyang komite ang pagsusulong nito ngayon.

“Ako, gusto kong baguhin ang Konstitusyon pero pagkatapos muna ng eleksyon,” diin ni Gordon na sinasabing interesado rin umano sa presidential race.

Kaugnay nito, inilutang ng militanteng grupong Pamalakaya ang pangambang bubusu­gin ng Malacañang ng mga proyekto ang mga barangay officials sa buong bansa bilang ‘alas’ sa pagsusulong ng ChaCha.
Maging ang ipinupuwestong bagong komposisyon ng gabinete ni Arroyo ay pinangangambahang bahagi ng ambisyosong plano ng ‘no elections’ na unang hakbang ng term extension via ChaCha.

Ngunit tahasan itong pinabulaanan ng Malacañang at sa pamamagitan ni deputy presidential spokesman Anthony Golez ay sinabi nitong, “The 2010 election is pushing through amidst the ChaCha rumors.”

Mahigpit ding itinanggi ni Local Government Sec. Ronaldo Puno ang pahayag kamakailan ni Makati City Mayor Jejomar Binay na gagamitin diumano ng pamahalaan ang kinakalap na mga impormasyon sa bawat barangay para muling buhayin ang ChaCha sa pamamagitan ng panibagong People’s Initiative (PI).