Nanganganib na maipasara ang Pediatric Neurosurgical Craniofacial Unit ng Philippine Gene­ral Hospital (PGH) dahil sa pang-iipit ng Malacañang sa pondo ng pork barrel fund ng oposisyon.

Ayon kay Sen. Pia Caye­tano, kailangang buhusan ng pondo ng pamahalaan ang nasabing unit dahil nanganganib itong maipasara samantalang ma­laki ang naitutulong nito sa mga mahihirap, lalo na ang mga batang may ginagamot sa sakit nilang hydro­cephalus, encephaloceles at spina bifida.

“It is the national go­vernment which should be taking pains to ensure that there’s sufficient budget for important health facilities like this. But sadly, its proponents are forced to source funding from private donors because it’s not a Palace priority,” paliwanag ni Cayetano.

Umaabot na sa 168 bata na ang pamilya ay hindi kayang gastusan ang mahal na cranial at spinal surgery ang natulungan ng nasabing unit simula nang maitayo ito noong Abril 2008.

Karamihan sa pondong ginagamit dito ay nangga­ling pa sa Compañero Rene Cayetano Foundation at Gabriel Symphony Foundation.

Naniniwala pa si Caye­tano na kung hindi lang namimili ang Malacañang at ang Department of Budget and Management (DBM) sa pagpapa­labas ng pondo ng Priority Development Assistance Fund (PDAF) na kilala sa pork barrel fund ng mga senador, hindi sana nahihirapan sa funding para mapatakbo ang nasa­bing unit ng PGH.
­