Dahil na rin sa karaniwang kaso na kinahaharap ng mga mediamen, pa­ngunahin na ang kasong libel na kadugtong na ng kanilang trabaho, sumaklolo naman kahapon ang Public Attorney’s Office (PAO) at nagpahayag ng pagbibigay ng libreng serbisyong legal sa lahat ng print at broadcast media practitioners.

Sa memorandum circular no. 001 na ipinalabas ni PAO chief Percida Rueda-Acosta sinabi nito na dapat mayroong katuwang ang mediamen sa kanilang pagtupad ng tungkulin at ang pagbibigay ng serbisyong legal ay isa sa paraan upang hindi ito matakot na ilabas ang katotohanan sa likod ng mga kontro­bersya.

Sa 2-pahinang memorandum batay sa Republic Act 9406 ay inatasan ni Acosta ang tanggapan ng Regional Public Attorney’s, Division chiefs, District public Attorney’s, officers-in-charge, PAO lawyers at lahat ng staff nito na magbigay ng serbisyong legal sa kanilang inquest at night court duties.

Kasama umano sa me­morandum ang mga print at broadcast media practitioners at kanilang mga staff na makakaranas ng pangha-harass na may ki­nalaman sa kanilang trabaho.