Kada pasok ng Bagong Taon, bilang mga Pinoy, halos walang mintis na feel na feel natin ang good mood at positve spirit na dala ng isang panibagong simula sa ano mang aspeto natin sa buhay. At pagdating sa sports, hindi din ito nagkakaiba lalo na para sa mga masisipag nating mga atleta na walang ginawa kundi kumayod ng kumayod at mag-ensayo ng husto upang pagali­ngin pa ang kanilang skills. At para kanino? ‘Di lamang para sa kanila kundi pati para sa bayan.

Nitong 2009, may mga malalaking sporting events na naman na mabibigyang pagkaka­taon muli ang ating mga manlalaro na mamayagpag muli.

Unahin natin ang bil­yar, sa taong ito, naka-set na daw ang World Pool Championships na dapat sa 2008 gaganapin ito, pero naunsyami umano dahil sa mga problema sa pondo at nalitpat ng WPC at ng BMPAP sa first quarter na lang ng 2009. Dito sa wakas makikita natin in action ang lahat ng mga mabibi­gat nating mga pool stars tulad nila Efren “Bata” Reyes, Django Bustamante, Alex Pagulayan, Ronnie Alacno, Dennis Orcollo, at Roberto Gomez. Lahat ng mga biga­ting ito ay hindi nagpakita sa World Ten Ball Championships na matagumpay na napatakbo ng WPA at ng Raya Sports/BSCP bagama’t binoykot ng mga BMPAP stars na sina Bata and Co.

Sa bandang katapusan din ng taon gagawin muli ang World Ten Ball Championships kung saan tatangkaing depensahin ng Briton na si Darren Appleton ang kanyang titulo. Aarangkada bang muli si Demosthe­nes Pulpul? Lalaro na ba sina Bata?

Pero sa tingin ko, ang pinakamagandang tanong na masasagot sa bilyar nitong taon ay kung totoo bang patay na ang 9-ball at na-ungu­san na ng 10-ball? O mas malakas pa rin ba ang 9-ball? O kaya ba nilang parehong mag-share ng limelight? Malalaman natin ‘yan pagkatapos mamayagpag ang parehong World Championships dito sa bansa at ang taong bayan na lang ang huhusga at hindi ang kani-kanilang kampo na magmamayabang, tama po ba?

Sa basketball naman, nariyan ang mga makasaysayang run na hinahabol ng San Beda at Ateneo sa kani-kanilang liga. Ang San Beda ay hinahanap ang kanilang unang 4-peat sa NCAA pero hindi ito magiging madali para sa Red Lions. Wala na sa team nila ang mga lider na sina Pong Escobal at Sam Ekwe. Kaya’t nasa balikat na lang nina Ogie Menor at Borgie Hermida at ang pamalit ni Ekwe na si Sudan Daniels na isang 6’8” na higante mula Amerika. Kaya pa rin ba ni coach Frankie Lim ang pressure? Mana­natili pa ba si coach Frankie sa San Beda bagama’t may chismis na kukunin ng San Beda si Dindo Pumaren?

Sa UAAP naman, haha­bulin siyempre ng Ateneo ang kanilang pangala­wang back to back titles sa liga. Maraming nagsasabi na ‘di malayong mangyari ‘yun dahil halos buo pa rin ang team ni coach Norman Black. Ang nawala lang sa Blue Eagles ay sina Yuri Escueta at Chris Tiu pero an­dun pa rin sina MVP Rabeh Al Hussaini, Nonoy Baclao, E­ric Salamat at Rookie of the Year na si Ryan Buenafe. At malakas pa ang ugong na makukuha ng Ateneo ang pinaka-pinag-aagawan na high school player na si RV Bringas ng San Sebastian. Kaya ba ng Ateneo? Kaya pero mahirap sa tingin ko dahil handang-handa na ang DLSU sa dami ng mga recruits din nila bagama’t nawala na din si JVee Casio. Pero crucial para sa DLSU ay kung makukumbinsi pa nila si Rico Maierhofer na ‘wag munang mag-PBA. Maliban sa DLSU, tingin ko na title contender din ang FEU at isama na natin ang mga Final Four favorites din na UE (bagama’t wala na si coach Dindo), UST, at A­damson, at NU. Ang UP naman ay nasa rebuilding stage pa rin naman sa ilalim ni coach Aboy Castro.

Sa mga pro player naman natin, aabangan natin ang pag-develop ng PBA sa taong ito kung saan makikita nating magiging Burger King ang Air21 at kung ano na ba talaga ang mangyayari sa Red Bull na ngayong nag-resign na si Coach Yeng at tila pinamigay na nila lahat ng magagaling nilang player.

Sa National Team naman mate-testing na si Coach Yeng Guiao sa international stage habang dadalhin niya ang kanyang hand-picked team sa SEABA at FIBA Asia Men’s Championships para makahakbang muli sa kanilang goal na makalaro sa 2012 London Olympic games.

Sa boxing naman si­yempre, aabangan natin ang mga laban ni Manny Pacquiao kontra kina Ricky Hatton at malamang susunod dun sina Edwin Valero at kung lalabas mula sa retirement, si Floyd Mayweather Jr. Pero maliban kay Manny, mas kailangan nating pagtuunan ng pansin ang tila papalit sa kanyang trono bilang nagdadala ng boxing para sa mga Pinoy.

Nariyan ang mga title defense nina Nonito Donaire, Gerry Peñalosa, at Donnie Nietes at ang paghahabol ng mga titulo nina Ber­nabe Concepcion, Florante Condes, Brian Viloria, Boom-Boom Bautista, AJ Banal, at Z Gorres.

At sa ating ibang mga atleta namang sasabak muli sa SEA Games nitong taon sa Laos. Mauulit kaya nila ang #1 performance noong SEA Games dito sa Manila?

O mahihirapan na naman ba tayong umusad sa medal tally gaya ng nangyari sa Thailand?

Sa lahat ng mga events at laro ng mga big stars natin sa sports, iisa ang kasigurhan na nakikita ko, tayong mga sports fans, ay forever na magiging loyal sa likod nila manalo o matalo basta’t lalaban sila ng patayan para sa bayan.

***

Sumulat sa Buzzer Beater sa tmanotoc@gmail.com