DOHA, Qatar — Hangad ng isa ang pananatili sa No. 1 ranking habang ang isa naman ay nais mabawi ang top spot.

Ito ang mga misyong nais na kapwa matupad ng Kastilang si Rafael Nadal at Swiss netter Roger Federer sa pagbubukas ng kanilang 2009 season sa Qatar Open.

Si Federer, na nangangailangan na lamang ng isang Grand Slam title para mapantayan ang career record na 14 crowns ni Pete Sampras, ay nagkampeon na sa Doha noong 2005 at ‘06.

Ngayong taon ay makakatapat niya si Potito Starace ng Italy at posibleng muling makatagpo si defending champion Andy Murray sa semifinals.

Sinabi ni Federer na isa sa nais niyang makamit ngayong taon ay ang muling okupahin ang top ranking. Tinalo niya si Murray sa U.S. Open final para sa kanyang tanging Grand Slam title noong 2008 ngunit inilaglag naman siya ng Briton noong Biyernes sa Capitala World Tennis Championship semis sa United Arab Emirates.

Nanaig naman si Nadal sa French Open at Wimbledon sa nakaraang season bago sungkitin ang Beijing Olympics gold.

Ang kasalukuyang No. 1 netter na si Nadal ay tinalo naman ni Murray sa finals ng exhibition game sa UAE.