Naghugas-kamay kahapon ang First Family sa alegasyong sila ang nasa likod ng sinasabing “landlord lobby” laban sa Comprehensive Agrarian Reform Program (CARP) extension law.

Sinabi ni Deputy Presidential Spokeswoman Lorelei Fajardo, na hindi totoo ang nasabing paratang na sina Pangulong Gloria Macapagal-Arroyo at Pampanga Rep. Juan Miguel ‘Mikey’ Arroyo ang nasa likod ng umano’y “landlord lobby” laban sa mas magandang bersyon ng CARP tulad ng alegasyon ni Bayan Muna partylist Rep. Satur Ocampo.

Sinabi nito na nananati­ling tagasuporta ng genuine agrarian reform ang buong First Family lalo na’t legacy ito ni dating Pangulong Diosdado Macapagal, ama ni Pangulong Arroyo.

“President Diosdado Macapagal’s legacy was his crusade for genuine agra­rian reform. the President and her family are committed to continuing this le­gacy. This accusation is untrue,” ani Fajardo.

Kaugnay nito ay sinabihan din kahapon ng Malacañang ang Kongreso at Department of Agrarian Reform (DAR) na gawin nang mabuti ang kanilang trabaho pabor sa interes ng mga farmer beneficiaries ng CARP.

Matatandaang ang First Family partikular si First Gentleman Jose Miguel ‘Mike’ Arroyo ay nagma­may-ari ng 500 ektaryang sugar lands sa Negros Occidental at 150 ektaryang Hacienda Bacan sa nasabi ring lalawigan.