Walang isda sa palengke!
Ito ang binitiwang banta kahapon ng ilang samahan ng mangingisda
sa Pilipinas sa pangunguna ng militanteng grupong Pamalakaya bilang
protesta sa para sa kanila’y hindi na makatarungang halaga
ng langis.
Kung dati ay transport holiday lang ang ikinakasa para iprotesta
ang sumisirit na oil prices, sa pagkakataong ito ay desidido ang
mga mangingisda na itigil ang kanilang panghuhuli ng mga
produktong dagat upang iparamdam sa pamahalaan ang kanilang sentimiyento.
Binigyan-diin ni Fernando Hicap, national chairman ng Pamalakaya,
na hindi lamang ang mass transport sector tulad ng jeep, bus at
taxi ang apektado ng walang tigil na paglobo ng presyo ng langis
sa bansa kundi sila man na gumagamit din ng produktong petrolyo
sa kanilang mga bangkang pangisda.
Dahil dito, balak umano ng iba’t ibang grupo ng mga mangingisda
na ilarga ang ‘fish holiday’ o ‘fishless market’
bago matapos ang buwang ito.
Isasagawa umano ito sa iba’t ibang lalawigan ng bansa at kung
hindi man matupad ang target na ‘zero fish’ sa mga pamilihan
ay sisiguruhin ng mga mangingisdang mararamdaman ng pamahalaan ang
kakapusan ng mga produktong dagat sa araw na iyon.
Kahapon ay kinastigo rin ng Pinag-isang Samahan ng mga Tsuper at
Operators Nationwide (Piston) ang panibagong plano ng mga kumpanya
ng langis na muling magtaas ng presyo ng kanilang mga produkto ngayong
pumalo na sa US$100 kada bariles ng halaga ng krudo sa world market.
Sampal kay Reyes
Hinggil naman sa pagpapatawag ni Pangulong Gloria Macapagal-Arroyo
ng isang energy summit, tahasang sinabi ni Sen. Francis ‘Chiz’
Escudero na isang malaking sampal ito kay Sec. Angelo Reyes ng Department
of Energy (DOE) dahil lumilitaw na inutil ito sa kanyang tungkulin
kaya’t kailangan pa ang isang summit para resolbahin ang oil
crisis sa bansa.
Hindi rin naniniwala si Escudero na may positibong ibubunga ang
naturang summit maliban sa kahihiyan para kay Reyes. “The
summit will not accomplish anything other than to highlight the
ignorance and incompetence of energy officials who need to call
a summit just to find out what’s going on,” diin ng
senador.
Sa halip na mag-aksaya ng panahon sa isang summit ay inirekomenda
ni Escudero na rebyuhin na lamang ang Oil Deregulation Law upang
malaman kung sinasamantala na ito ng mga oil companies.
Sinuportahan din ni Escudero ang panukala ni Sen. Mar Roxas na isuspende
nang anim na buwan ang pangongolekta ng pamahalaan ng expanded value
added tax (EVAT) sa mga produktong petrolyo upang mapagaan ang halaga
nito.
‘Wag magpanik
Ayon naman kay Reyes, ikinukonsidera na umano ng pamahalaan ang
pagbabawas ng tariff sa oil products bilang alternatibong solusyon
sa sumisirit na oil price sa world market.
Hinimok din ng kalihim ang publiko na huwag magpanik dahil kumikilos
na umano ang gobyerno para saklolohan ang sambayanan sa isyu ng
oil price hikes.
Libro ng oil firms ilalantad
Ipinasisilip na rin ni Reyes ang libro o financial statement ng
mga kumpanya ng langis, partikular ang tinaguriang ‘Big
3’ (Petron, Shell at Chevron na dating Caltex).
Nabatid na may kinomisyon na umanong accounting firm, ang Sycip,
Gorres and Velayo (SGV), at isinangkot din ang think-tank ng isang
unibersidad, upang siyang sumilip sa libro ng mga kumpanya.
Layunin umano nito na madetermina kung may pang-aabuso sa bahagi
ng mga oil firms at kung tunay na minamanipula ng mga ito ang industriya
na mahigpit na ipinagbabawal ng Oil Deregulation Law.
“Nirerepaso ang submissions ng Petron, Shell at Chevron. Ang
objective natin is to come to an assessment of reasonableness of
their prices. I would expect by the middle of this month matatapos
ng University of Asia and the Pacific and SGV (ang assessment),”
ani Reyes.
Idinagdag pa ng kalihim na maging ang maliliit na kumpanya ng langis
at tinatawag na new players ay hindi rin paliligtasin
sa financial review upang malaman kung totoong nagkakaroon ng overpricing
ng langis sa lokal na merkado.
|
